निरौलाया धापूयात प्रधानमन्त्रीया खण्डन
ओली व भण्डारीया ल्वापु सतहलय्
येँ (नेपालभाषा टाइम्स)/ प्रधानमन्त्री ओली व पुलांम्ह राष्ट्रपति विद्यादेवी भण्डारीया ल्वापु थप सतहलय् पिहां वःगु दु । थ्वहे झ्वलय् एमाले येँ जिल्ला कमिटीया अध्यक्ष दिपक निरौलां सार्वजनिक याःगु प्रधानमन्त्रीया सम्बोधनया सारयात कयाः प्रधानमन्त्री कार्यालयं खण्डन यायेवं ल्वापु सतहलय् खनेदुगु खः ।
वंगु बुधवाः येँ जिल्ला कमिटीया विधान महाधिवेशन प्रतिनिधितय्त ओलीं थःगु निवासय् सःतूगु खः । उगु इलय् ओलीं न्ववाःगु खँ धासें निरौलां फेसबुकय् ४८ बुँदाय् सम्बोधनया सार च्वःगु खः । उगु सारय् प्रधानमन्त्री ओलीं पुलांम्ह राष्ट्रपति भण्डारीयात गुगुं नं हालतय् पार्टी अध्यक्ष दयेके मफइगु, भण्डारी अधिवेशनय् त्याइगु आधार मदु, भण्डारीया अवस्था नं पुलांम्ह उपाध्यक्ष भीम रावलया थें जुइ धाःगु खँ न्ह्यथनातःगु दु । निरौलां याःगु उगु पोस्टया आधारय् थीथी सञ्चार माध्यमं समाचार नं च्वःगु खःसा गुलिसिनं निरौला लिसे खँल्हाबल्हा यानाः समाचार च्वःगु खः ।
लिपांगु इलय् विद्या भण्डारी पक्षधर धकाः म्हसिउम्ह निरौलां सामाजिक सञ्जालय् ईश्वर पाखरेल व विनोद ढकालपिंसं भण्डारीयात ल्ह्वनेगु ज्या यानाच्वंगु, मदन भण्डारीया जनताको बहुदलीय जनवाद सुं छगू परिवारया सम्पत्ति मखु धकाः प्रधानमन्त्री ओली धाःगु दावी यासें च्वःगु खः ।
थुकियात कयाः थीथी सञ्चार माध्यमय् समाचार वयेवं म्हिगः सुथय् प्रधानमन्त्री ओलीया सचिवालयं उगु खँया खण्डन याःगु दु । निरौलां च्वःगु विषययात खण्डन यायेत सार्वजनिक याःगु प्रेस नोटय् धयातःगु दु, ‘अनौपचारिक सहलह व नापलायेगु झ्वलय् प्वंकूगु धापूयात न्ह्यथनाः गुलिखे सञ्चार माध्यम व सामाजिक सञ्जालय् सम्प्रेषित सुचं व समाचारया सम्बन्धय् प्रधानमन्त्रीया सचिवालयया ध्यानाकर्षण जूगु दु ।’
सचिवालयया कथं उगु ज्याझ्वः प्रशिक्षणमूलक मखु । बुधवाः हे उगु प्रकृतिया नापलायेगु ज्या यल जिल्लां विधान महाधिवेशनय् प्रतिनिधि याइपिं न्ह्यलुवा कार्यकर्तात लिसे नं याःगु खः । उबलय्या खँ सार्वजनिक मजू, येँ जिल्लाया खँ जक सार्वजनिक जूगु धासें निरौलां न्ह्यथंगु विषयवस्तुयात कयाः प्रधानमन्त्री सचिवालयं आपत्ति नं प्वंकूगु दु ।
उगु प्रेस नोटय् प्रधानमन्त्री ओलीं नापलायेगु झ्वलय् ‘पुलांम्ह राष्ट्रपति भण्डारीयात थम्हं थें सम्मान व माया मेपिं नेतातय्सं याःगु मदु व वय्कः आः पार्टी व नेतृत्वया विरोध याइगु थासय् गुकथं लात धइगु खँ अजू चाः’ धकाः प्रधानमन्त्रीं न्ववाःगु खँ न्ह्यथनातःगु दु । प्रधानमन्त्री सचिवालयं सम्बन्धित सकसितं सत्य तथ्य बुझे यानाः जक समाचार सम्प्रेषण यायेत इनाप नं याःगु दु ।
मेखे एमालेया येँ जिल्ला अध्यक्ष निरौलां धाःसा थम्हं अध्यक्ष ओली न्ववाःगु खँ छगू इन्च नं उखेथुखे मयानागु दाबी याःगु दु । अध्यक्ष निरौलां यदि थ्व खँय् विश्वास मदुगु खःसा बालुवाटारया अफिसियल क्यामेरां खिचे याःगु भिडियो स्वयेफइगु खँ नं धाःगु दु ।
LEAVE YOUR COMMENTS