ने. सं. ११४६ चाैलागा आमै - माँया ख्वाःस्वयेगु

भदौ १४ य् प्रम ओली चीन वनीगु

थःगु खँ दृढतापूर्वक तयेत नारायणकाजीया इनाप
येँ (नेपालभाषा टाइम्स)/ भारत व चीन सीमा विवादया दथुइ प्रधानमन्त्री केपी शर्मा ओली चीन भ्रमणय् झाइगु जूगु दु । प्रधानमन्त्री केपी शर्मा ओली थ्वहे वइगु भदौ १४ गते चीन भ्रमणय् झायादीत्यंगु खः ।
थ्वहे वइगु भदौ १५ व १६ गते चीनया तियानजिनय् जुइगु सांघाई सहयोग संगठनया शिखर सम्मेलनय् ब्वति कायेत प्रम ओली चीन झायेत्यंगु खः । सम्मेलनय् संगठनया दुजः राष्ट्रया सरकार प्रमुखतय्‌सं ब्वति काइगु ज्याझ्वः दु ।
चीनय् जुइगु शिखर सम्मेलनय् भारतीय प्रधानमन्त्री नरेन्द्र मोदी व चिनियाँ राष्ट्रपति सी जिनपिङ नं ब्वति काइगु ज्याझ्वः दु । प्रमया चीन भ्रमणया झ्वलय् भारत व चीन दथुइ जूगु लिपुलेक व्यापार सम्झौतायात कयाः सहलह यायेमाःगु माग जुयाच्वंगु दु ।
थ्वहे झ्वलय् सीदुकथं प्रम ओली भारतीय प्रम मोदी लिसे साइड लाइन वार्ता याइगु सम्भावना दु । उगु वार्ताया झ्वलय् भारत व चीन दथुइ जूगु व्यापारिक सम्झौतायात कयाः प्रम ओलीं नेपाःया खँ तइगु खः वा मखु धइगु खँ धाःसा स्पष्ट याःगु मदुनि ।
थ्वहे झ्वलय् नेकपा माओवादी केन्द्रया वरिष्ठ उपाध्यक्ष नारायणकाजी श्रेष्ठं लिपुलेक बारे भारत व चीन दथुइ जूगु सम्झौता नेपाःया सार्वभौमिकताय् प्रहार जूगु धासें उकियात प्रधानमन्त्रीया चीन भ्रमणया झ्वलय् ल्ह्वनेमाःगु माग यानादीगु दु ।
वय्‌कलं म्हिगः तु किसानतय् आन्दोलनयात समर्थन यायेत वंगु ज्याझ्वलय् न्ववायेगु झ्वलय् धयादिल, ‘थ्व विवाद ज्यंकेनु । थुकिया शुरुवात जिमिसं यानागु मखु छिकपिंसं याःगु खः । जिमिगु तथ्य प्रमाणं धयाच्वंगु दु । लिम्पियाधुरा, कालापानी व लिपुलेक नेपाःया भूमि खः । उकी गुगुं नं विवाद मदु । तथ्य व प्रमाणसहित नेपालं उगु खँ धायेधुंकूगु दु । तर भारतं उकियात सहज स्वीकार यायेगु पलेसा परराष्ट्र मन्त्रालयया सचिव स्तरया बैठक तयाः ज्यंकेगु खँ ल्हाइ, तर बैठक गबलें तइ मखु । थ्व दुखद खँ खः ।’
वय्‌कलं प्रधानमन्त्री केपी ओलीयात चीत भ्रमणया झ्वलय् भारत व चीनयात सीमा विवाद बारे थःगु खँ दृढतापूर्वक तयेत इनाप नं यानादीगु दु । प्रम ओली चीन भ्रमण क्वचायेकाः भदौ१९ गते लिहां झाइगु ज्याझ्वः दु ।