वज्रयोगिनी वनीपिंत निःशुल्क बस सेवा
सक्व (नेपालभाषा टाइम्स)- येँय् नं उत्तरी भेगय् लाःगु थनया माधव नारायण मेलाय् वइपिनिगु निंतिं निःशुल्क बस सेवा संचालन याःगु दु । शालीनदी यातायात बस सेवा समितिं मेलाय् वइपिं भक्तजनयात वज्रयोगिनीतक यंकेत निःशुल्क बस सेवा संचालन याःगु खः।
समितिं वंगु पुस २२ निसें हे श्री स्वस्थानी (माधवनारायण) मेला ज्वःछि शालीनदी मेलाय् वइपिं भक्तजनया निंतिं उगु सुविधा बीत सार्वजनिक विदा व शनिवाः निगः बस निःशुल्क रुपं संचालन याःगु खः ।
समितिया अध्यक्ष गोविन्दबहादुर श्रेष्ठया कथं शालीनदी मेलाय् वइपिं भक्तजनयात वज्रयोगिनीतक वनेत सक्वस्थित न्हूगु बसपार्कं वज्रयोगिनीतक वने न्हिं निगः बस निःशुल्क प्रदान याःगु खः । शालीनदी मेलाय् वइपिं भक्तजनत वज्रयोगिनी द्यःयाताय् नं वनीगु जूगुलिं इमिगु सुविधाया निंतिं उकथंया सेवा उपलब्ध यानागु समितिं जानकार बिउगु दु ।
मेखे थगुने, नगुने कोरोना संक्रमणया महामारीया कारणं मेलाय् वइपिं भक्तजनया ल्याः तुलनात्मक रुपं म्हो जूसां थुगुसी करिब ३० गू लखया ल्याखय् भक्तजनत वइपिं अनुमान यानातःगु दु । श्री माधवनारायण स्वस्थानी व्रत तथा शालीनदी मेला सुधार समितिया अध्यक्ष बालकृष्ण श्रेष्ठं थुगुसी ३० गू लख स्वयां अप्वः भक्तजन वइगु अपेक्षा यानागु जानकारी बियादीगु दु ।
थ्व हे झ्वलय् थन न्ह्यानाच्वंगु श्री माधवनारायण शालीनदी मेलाया झिंस्वन्हुया दिं तकया दुने स्वीगू लख तका दां संकलन जूगु दु । मेला व्यवस्थापन समितियाकथं शालीनदी परिसरय् सहयोगीतय्पाखें झिंस्वन्हुया दिंतकयादुने २९,९९,७०१÷– तका संकलन जूगु दु ।
आतकया दुने न्हिं छगू लख निसें प्यंगू लख तका संकलन जूगु व आतकया दुने दकलय् अप्वः मनमाया श्रेष्ठ छम्हेसिनं जक १,०१,१०५ तका ग्वाहालि याःगु समितिं जानकारी बिउगु दु । थुकथं हे नानी हेरा महर्जनं छगू लख न्यातका, कल्पना डंगोल व अजय डंगोलं छगू लख न्यातका ग्वाहालि याःगु दु ।
LEAVE YOUR COMMENTS