ललिता निवास काण्डय् एनआरएनएं अपिल याइगु

येँ (नेपालभाषा टाइम्स)÷ललिता निवास काण्डय् विशेष अदालतया आदेश विरुद्ध गैरआवासीय नेपाली संघ (एनआरएनएं) सर्वोच्च अदालतय् अपिल याइगु जूगु दु । ललिता निवासया फुक्कं जग्गा सरकारीकरण यायेगु फैसला विरुद्ध एनआरएनएं सर्वोच्च अदालतय् अपिल यायेत्यंगु खः ।

संघपाखें प्रवक्ता फणीन्द्र पन्तं म्हिगः जारी याःगु विज्ञप्तिइ अपिल लिपा वइगु सर्वोच्च अदालतया निर्णय संघयात मान्य जुइ धासें उगु ई तकया नितिं भोगाधिकार हक व स्वामित्व संघय् हे निहित जुइगु खँ न्ह्यथनातःगु दु ।

विज्ञप्तिइ सर्वोच्च अदालतं नं विशेष अदालतया फैसलायात सदर याःगु खण्डय् धाःसा जिल्ला अदालत येँय् तत्कालीन अवस्थाय् संघयात जग्गा मिउपिंत मुद्दा तयाः लागत ध्यबा कायेगु व फुक्कं कथंया क्षतिपूर्ति असुर उपर याये दइगु अधिकार निहित जूगु खँ नं न्ह्यथनातःगु दु ।

एनआरएनएं स्वपी जग्गाय् केन्द्रीय सचिवालय भवन दयेकूगु इलय् येँ मनपां भवन निर्माणया स्वीकृत बिउगु खः । एनआरएनएं ललिता निवासया विवादित जग्गा शोभाकान्त ढकाल, रामकुमार सुबेदी, सन्दीप ढकाल, उमाकुमारी ढकाल व माधवी सुबेदीपाखें न्यानाकाःगु खः । संघं प्रति आना २६ लाख ५० हजार तकाया ल्याखं स्वपी जग्गा न्याःगु खःसा २९ करोड तका खर्च यानाः भवन नं दयेकेधुंकूगु दु । जग्गा न्यायेत व छेँ दनेत थीथी कार्यकालय् हलिंन्यंकंया दुजःतय्पाखें ध्यबा मुंकूगु खः ।