वीर–पूर्ण पुस्तक संग्रहालय छत्वाः म्हसीका

वीर–पूर्ण पुस्तक संग्रहालय यलया पूर्णबहादुर वज्राचार्य एण्ड सन्स निवासय् थनिं प्यंगू दशकसिबें न्ह्यः हे पवित्रबहादुर बज्राचार्य व दुण्डबहादुर बज्राचार्यपिंसं ममतमयी मां वीरमाया वज्राचार्य व बौ पूर्णबहादुर वज्राचार्यया पुण्य स्मृतिइ नीस्वंगु छगू निजी पुस्तकालय खः।

न्हापांनिसें हे श्रद्धेय पूर्णबहादुर वज्राचार्य बुद्धधर्मया सफू ब्वनेगु, मुंकेगु, वथें धर्म दानया रूपय् सफू दान यायेगुली मन क्वसाःम्ह खः । विद्वान धम्मादित्य धर्माचार्यया विशेष प्रेरणां यानाः वसपोल पूर्णबहादुर वज्राचार्यं बुद्ध धर्मसम्बन्धी पालि, संस्कृत, हिन्दी, अंग्रेजी व नेपाली सफू थम्हं संग्रह यानाबिज्याःगु खः ।

वसपोल दिवंगत जुसेंलि वसपोलया काय्पिंसं थः बौया अनुशरण यानाः बुद्धधर्म व नेपालभाषाया यक्व सफू मुंकाः वृहत् पुस्तकालयया रूपय् परिणत याःगु जुल । वसपोलपिंसं थुगु पुस्तकालययात संग्रहालयया रुपय् विकसित यानाः वीर–पूर्ण पुस्तक संग्रहालयया नामं संचालन याःगु जुल ।

थुगु संग्रहालयया संस्थापक अध्यक्ष श्रद्धेय पवित्रबहादुर बज्राचार्य, हेरादेवी वज्राचार्य व अशोकरत्न वज्राचार्य (काय्चा) थुपिं स्वम्ह जानाः बौद्ध ग्रन्थत मुंकेगु व संरक्षण यायेगुया नापं थः किजा दुण्डबहादुर बज्राचार्यपाखें अनुदित नेपालभाषा व नेपाली भाषाया त्रिपिटक ग्रन्थत प्रकाशन यानाः ब्वँमिपिनिगु समक्ष थ्यंकेगु ज्याय् अविस्मरणीय योगदान यानाबिज्याःगु दु ।

नेपाली भाषाया सफूत संग्रह यायेगुली मदन पुस्तकालयया गज्याःगु स्थान दु बुद्धधर्म व नेपालभाषाया
सफूत संग्रह यायेगु व प्रकाशन यायेगुली थुगु पुस्तक संग्रहालयया विशिष्ट स्थान दु

वसपोल पवित्रबहादुर वज्राचार्य व वि. सं २०५८ मंसिर १५य् सुश्री हीरादेवी वज्राचार्य दिवंगत जुसेंलि दुण्डबहादुर बज्राचार्य थुगु वीर–पूर्णपुस्तक संग्रहालयया अध्यक्ष जूगु जुल । नेपालय् वसपोल स्वयं त्रिपिटक ग्रन्थत अनुवाद यायेगु ज्याय् प्यंगू दशक न्ह्यवंनिसें अनवरत रूपं लगे जुयाच्वंगु जक मखु थःपिनिगु हे आर्थिक स्रोतं ग्रन्थत प्रकाशन यायेगु ज्याय् ज्वःमदुगु योगदान बिया वयाच्वंगु दु ।

फलस्वरुप याकःचिया प्रयासं हे वसपोलपाखें प्यब्वय् छब्वं मयाक त्रिपिटकया ग्रन्थत अनुवाद यानाः प्रकाशन समेत याःगुु दु । अथे हे बुद्धशासन चीरस्थायी यायेत व भाषा साहित्य उत्थान यायेत न्ह्यथनेबहकथं ततःधंगु योगदान बियाच्वंगु जुल । थौं थुगु संग्रहालय यथासम्भव नेपालभाषायागु दक्वं सफू संग्रह यायेगुया लिसें बौद्ध ग्रन्थत विशेष यानाः त्रिपिटक ग्रन्थत प्रकाशन यायेगु संस्थाया रुपय् अग्रणी थाय् कायेत सफल जूगु खनेदु ।

नेपाली भाषाया सफूत संग्रह यायेगुली मदन पुस्तकालयया गज्याःगु स्थान दु बुद्धधर्म व नेपालभाषाया सफूत संग्रह यायेगु व प्रकाशन यायेगुली थुगु पुस्तक संग्रहालयया विशिष्ट स्थान दु । देशया प्रमुख पुस्तकालयतय्त इलय् ब्यलय् थःगु जक मखु अन्य प्रकाशकतय्गु पुस्तकत समेत न्यानाः उपहार बियाः ग्वाहालि याना वयाच्वंगु दु । थुकिं यानाः नेपालभाषा व बुद्धधर्मया विद्यार्थीतय्त पठन सामग्री सहज रूपय् उपलब्ध जूगु जुल ।

त्रिभुवन विश्वविद्यालय, नेपाल एकेडेमी, नेपाल राष्ट्रिय पुस्तकालय, पुल्चोक, लुम्बिनीया केन्द्रिय पुस्तकालयलगायत थीथी अन्य विश्वविद्यालय, कलेजस्तरीय पुस्तकालयय् समेत बुद्धधर्मया सफूत उपलब्ध याका वयाच्वंगु दु ।
थुगु संग्रहालयपाखें इलय्ब्यलय् बौद्ध ग्रन्थत विमोचनया कार्यक्रम जुयाच्वंगु जुल ।

थुगु संग्रहालयया उद्देश्य थुकथं दु–
१. पालि त्रिपिटक व विविध भाषां अनुदित त्रिपिटक ग्रन्थत संकलन यायेगु ।
२. मूल पालि त्रिपिटक ग्रन्थत अनुवाद यायेगु, याकेगु नापं प्रकाशन यायेगु ।
३.पालि त्रिपिटकलिसे सम्बन्धित महत्वपूर्ण ग्रन्थत प्रकाशन यायेगु ।
४.विभिन्न भाषाय् प्रकाशित बुद्धधर्मसम्बन्धि सफूत संकलन यायेगु ।
५. नेपालभाषाय् प्रकाशित प्रायः फुक्क सफू, पत्रपत्रिका, क्यासेत, सि.डि आदि मुंकेगु ।
६. बुद्धधर्म सम्बन्धी अध्ययन अनुसन्धान यायेगु, याकेगु आदि आदि ।

वीर–पूर्ण पुस्तक संग्रहालयलपाखें च्वय् उल्लेखित उद्देश्य अनुसार थीथी ज्याझ्वः न्ह्याकाच्वंगु दु । थुपिं मध्ये मूल पालि भाषाया त्रिपिटक ग्रन्थ अनुवाद यायेगु ज्याकथं आःतक त्रिपिटकया छुं छुं अंश जक अनुवाद जुइ ल्यं दःसां थुपिं पूवनीगु अवस्थाय् दु ।त्रिपिटक–अनुवादक दुण्डबहादुर वज्राचार्यया कुशल नेतृत्व व व्यवस्थापनय् थुगु संग्रहालयपाखें त्रिपिटक ग्रन्थलिसें अन्य सफू प्रकाशन यायेगु क्रम निरन्तर न्ह्यानाच्वंगु जुल ।

थ्वहे दच्छिया दुने अर्थात् २०७४ साल जेठं खुद्दक निकायया पटिसम्भिदामग्ग व अभिधर्म पिटकया धम्मसङ्घिणी ग्रन्थत नं पिदंगु दुसा थ्व हे २०७५ साल बैसाख २२ गते पालि नेपालभाषा शब्दकोश नापं विनयपिटकया महावग्ग व अभिधर्म पिटकया यमक ग्रन्थत पिदनेत ताःलाःगु जुल । थ्व झी सकसियां निंतिं धर्मप्रीतिया खँ खः ।

बौद्ध ग्रन्थत प्रकाशन जूलिसे झीसं न्यानाः, ब्वनाः, बुद्धशिक्षा सयेकेगुली कुतः झीगु पाखें जुइमाःगु नं जुल । थ्व प्रत्येक नेपालभाषी व धर्मप्रति आस्थावान जिज्ञासुपिनिगु उत्तरदायित्व नं थपे जूगु जुल । छगू सफू न्याःसा मेगु छगू पिहां वइ धकाः सीके फःसा पुस्तक संग्रहालयया लक्ष्य याकनं पूवनी । थुकी छुं सन्देह मदु ।