शिक्षाय् बालेनया फय्गं दावी

येँ (नेपालभाषा टाइम्स)- येँ महानगरपालिकाया मेयर बालेन साहं थुगुसी पिहां वःगु एसईईया लिच्वः थःपिनिगु हे कारणं यानाः येँ महानगरपालिकाय् न्हापा स्वयां बांलाःगु खः धकाः यानादीगु दावी फय्गं खः धकाः पिहां वःगु दु ।

थुगुसी येँ मनपां एसईईया लिच्वः बांलाकेमाः धकाः थीथी स्कुलय् स्वलाया लागिं शिक्षक खटे याःगु खः । वहे शिक्षकतय्सं याःगु कुतःया कारणं थुगुसी येँ मनपाया सामुदायिक स्कुलतय्गु लिच्वः बांलाःगु धकाः येँ मनपाया मेयर बालेन साहं दावी यानादीगु खः । तर सम्बन्धित शिक्षाविद्तय्सं धाः कथं धाःसा थुगुसी येँ मनपा जक मखु मेमेगु नं नगरपालिकाया लिच्वः समेत बांलाःगु दु । थ्व लिच्वः बांलाःगु धइगु थगुनेया लिच्वःया तुलनाय् बांलाःगु खः ।

थगुने कोराना महामारीया कारणं देय्न्यंकं हे स्कुलया एसईईया लिच्वः स्यंगु खः । व स्वयां नं दछि न्ह्यः कोरोनाया कारणं यानाः जाँच हे मकासे स्कुलं छ्वयाहःगु हे नम्बर तयाः एसईईया लिच्वः सार्वजनिक याःगु खः । कोरानाया कारणं मस्तय्त अनलाइन कक्षां ब्वंकेगु याःगु कारणं पढाइया स्तर बांमलाःगु खः । उकिं जाँच काःसां थगुनेया लिच्वः खराब पिहां वःगु खः ।

तर थुगुसी धाःसा प्रत्यक्ष पढाइ शुरु जुयाः स्तर बांलाना वःगु जुयाः एसईईया लिच्वः नं बांलाःगु खः । परीक्षा नियन्त्रण कार्यालयं नं थुगुसी कोरोना लिपाया न्हापांगु जाँच जूगु कारणं यानाः लिच्वः बांलाःगु खः धकाः धाःगु खः ।

येँ मनपां थीथी स्कुलय् खटे यानाः छ्वःपिं शिक्षकतय्सं खास यानाः अन छुं ज्या याःगु खने मदु । उपिं स्कुलय् वयाः आखः ब्वंकेगु मयासे क्लासय् छक्वः निरीक्षण यायेगु व विषय शिक्षकयात सामान्य सुझाव जक बीगु ज्या याना थकूगु खः । विद्यार्थीतय्त ब्वंकेमाःगु मेहनत अन ब्वंकीपिं नियमित शिक्षकतय्सं हे याःगु खः ।

थःपिंसं मेहनत यानाः बांलाःगु लिच्वः हयागु खःसां जस धाःसा मनपां निला स्वलाया वःपिं निरीक्षकतय्त बिल धकाः थीथी सामुदायिक स्कुलया शिक्षकत नं तम्वयाच्वंगु दु । लुमंकेबहः, मेयर साहं नियुक्त याःम्ह शिक्षा सल्लाहकार रेशु अर्यालं नं राजीनामा बीधुंकूगु दु ।

‘राजनीतीकरणया खतरा’
येँ महानगरपालिका दुनेया फुक्क हे सामुदायिक विद्यालयया व्यवस्थापन समिति भंग यायेगु महानगरपालिकाया निर्णययात येँ मनपाया पुलांम्ह मेयर विद्यासुन्दर शाक्यं विरोध यानादीगु दु ।

विद्यालय व्यवस्थापन समितिया वर्तमान समितित भंग यानाः उकिया पलेसा आः वडा अध्यक्षया अध्यक्षताय् न्हूगु व्यवस्थापन समिति गठन यायेगु धकाः याःगु निर्णयपाखें आः स्कुलय् राजनीतीकरणया ज्या यक्व जुइ फइगु खँ नं पुलांम्ह मेयर शाक्यं कनादिल ।

वडा अध्यक्षत कम तर स्कुल यक्व दुगु जुयाः वडाध्यक्षं अन बांलाक ई बी मफइगु थुकिं यानाः स्कुलया व्यवस्थापन झन भद्रगोल जुइ फइगु खँ नं वय्कलं कनादिल ।

व्यवस्थापन समिति भंग यायेगु धकाः मनपां याःगु निर्णय प्रमुख प्रशासकीय अधिकृतं प्रमाणीकरण यात कि लागू जुइगु खँ धाःगु दु ।