गुथि संस्थानया सम्पत्ति सार्वजनिक यायेत माग लःल्हात

येँ – गुथि संस्कृति ल्यंकेगु निंतिं आन्दोनल याना वयाच्वंगु राष्ट्रिय पहिचान संरक्षण मंकाः संघर्ष समितिं गुथिं संस्थानया सम्पत्ति सार्वजनिक यायेमाःगु माग यासें भिंmन्हय्गू बुँदाया माग न्ह्यब्वःगु दु । गुथि संस्थानया कार्यवाहक अध्यक्ष मीनप्रसाद चौधरीयात संघर्ष समितिया संयोजक गणपतिलाल श्रेष्ठया नेतृत्वय् वंगु पुचलं उगु माग पौ लःल्हाःगु खः ।

माग पतिइ गुथि संस्थानया नामय् दुगु राज गुथि व छुट गुथिया जग्गया कित्ता नम्बर व क्षेत्रफलया मुक्कं ल्याः, २०२९ सालय् गुथि संस्थानं म्हःगु ध्यबा व उकिया खर्च, मालपोतय् राज गुथिया सम्पत्तिया रुपय् दुगु जग्गाया विवरण व उगु जग्गा थौंकन्हय् छु ज्याय् छ्यलाच्वन धइगु न्ह्यसः नं तयातःगुु दु ।

उकथं हे मालपोतय् छुट गुथिया सम्पत्तिया रुपय् दुगु जग्गाया विवरण व थौंकन्हय् उगु जग्गा छु ज्याया निंतिं
छ्यलाच्वंगु दु धइगु विवरण नं बीमाःगु माग यासें माग पौ न्ह्यब्वःगु खः । अथे हे मालपोत गुथि रैतानी नम्बरी जग्गाया रुपय् गुलि दर्ता जुयाच्वंगु दु । उगु जग्गाया विवरण व थौंकन्हय् उगु जग्गां गुलि मालपोत म्हयेगु ज्या जुयाच्वंगु दु धइगु न्ह्यसः थनातःगु दु ।

उकथं हे मालपोतय् गुथि अधिनस्थ जग्गाया रुप गुलि जग्गा दर्ता जुयाच्वंगु दु, उकिया विवरण व थौंकन्हय् गुलि जिन्सी गुथि संस्थानयात बुझे याना वयाच्वंगु दु, उगु जग्गा छु प्रयोजनया निंतिं छ्यला वयाच्वंगु दु धइगु न्ह्यसः तसें उकिया विवरण नं फ्वंगु दु ।

अथे हे गुथि संस्थानयाके २०२९ सालय् मुक्कं सम्पत्ति गुलि दु, गुथि संस्थानया जग्गाय् मोहियानी हक दुपिं गुलि दु, थौंकन्हय् गुलि संस्थानया मुक्कं सम्पत्ति गुलि दु धइगु न्ह्यसः थंसें २०२९ साल निसें थौं तक गुथिया जग्गा म्हो जुल वा अप्वल धइगु न्ह्यसः तयाः उकिया कारण छु खः धकाः नं न्ह्यसः न्यनातःगु दु ।

उकथं हे २०२९ साल लिपा नेपाल सरकारं गुलि जग्गा अधिग्रहण याःगु दु व गुलि जग्गाया क्षतिपूर्ति बीमाःगु दु धकाः नं न्ह्यसः थनातःगु दु । अथेहे थौंकन्हय् छु छु गुथिया जग्गा बालं बियातःगु दु, उगु जग्गा छु ज्याया निंतिं छ्यलाच्वंगु दु, उगु जग्गा बालं बीधुंकाः गुथि संस्थानं गुलि बालं कयाच्वंगु दु व उगु जग्गाया बालं छु गुथिया निंतिं खर्च यानाच्वंगु दु धकाः नं न्ह्यसः न्यनातःगु दु ।

अथे गुथि संस्थानं पुजा, जात्रा, पर्व निरन्तर रुपं न्ह्याकेगु निंतिं छु गुगु गुथियात गुलि ध्यबा बिया वयाच्वंगु
दु उकिया विवरण नं माग यानाः पौ बिउगु खः । पौ लःल्हानाः कायेगु झ्वलय् कार्यवाहक अध्यक्ष चौधरीं थःपिंसं गुथिया फुक्कं लगत तयार यानाच्वनागु व छसिकथं माग पतिइ न्ह्यब्वःगु मागयात कयाः सार्वजनिक यायेगु बचं बिउगु खः ।