न्हिंन्हि सिम हिलाः येँय् सुलाच्वंम्ह मनाङेयात ज्वन

येँ (नेपालभाषा टाइम्स)- ‘ज्यान मार्ने उद्योग’ दोषी ठहर जूम्ह गण्डकी प्रदेशया पुलांम्ह मन्त्री व सांसद दिपक मनाङेयात मंगलवाः ज्वंगु खः । येँया सानो भ¥याङय् च्वंगु कम्फोर्ट हाउजिङय् थःथितिया छेँय् सुलाच्वंम्ह मनाङेयात मंगलवाः सुथय् साढे १० बजे पाखे ज्वंगु खः ।

गुण्डा नाइके चक्रे मिलनयात स्यायेगु कुतः याःगु द्वपनय् पुनरावेदन अदालत यलं न्यादँया जेल सजायँ न्यंकातःगुयात कयाः तयातःगु पुनरावेदनय् सर्वोच्च अदालतं सजाय कायम हे जुइगु फैसला यायेवं मनाङे सम्पर्कविहिन जुयाच्वंगु खः ।

प्रहरीं धाःकथं मनाङें थःम्हं चले यानाच्वंगु मोबाइलय् न्हि न्हिं हे निगू स्वंगू सिम हिलाः प्रहरीयात झुके याना वयाच्वंगु खः । थ्व झ्वलय् मनाङें प्रहरीं थःगु मोबाइल ट्य्राक यानाच्वंगु दइ धयागु अनुमान यासें थःगु मोबाइल मेपिंत ज्वंकाः उखेथुखे चाःहिकातयेगु नं यानाच्वंगु खः । तर प्रहरीं छवाः न्ह्यवनिसें रेकी यानाः मनाङेयात कम्फोर्ट हाउजिङं ज्वनाहःगु खः ।

सर्वोच्चया फैसला वयेधुंकाः मनाङें सामाखुसीया तिलिङेटारय् थःगु मोबाइलया स्वीच अफ यानाः सम्पर्कविहिन जूगु खः । मोबाइल अफ याःगु थाय् येँय् हे जूगुलिं प्रहरीं मनाङे येँय् हे सुलाच्वंगु अनुमान यानाः रेकी यानाच्वंगु खःसा छवाः लिपा प्रहरीं सफलता चूलाकूगु खः ।

प्रहरी थ्यनेवं मनाङें थःत छाय् ज्वं वयागु, थःम्हं आत्मसमर्पण याये हे धायेधुननि धकाः प्रहरीयात हक्कूगु खः । सर्वोच्चया फैसला वयेधुंकाः मनाङें थ्व फैसलाया पूर्ण पाठ वयेधुंकाः थः हे अदालतय् वयाः आत्मसमर्पण यायेगु धकाः वंगु कात्तिक २३ गते छगू वक्तव्य पिकाःगु खः । तर मनाङे देय् त्वःता बिसिउँ वनेगु निंतिं जक थज्याःगु चाल यायेगु अनुमान यासें प्रहरी वयात ज्वनेत सक्रिय जुयाच्वंगु खः ।

मनाङेयात आः डिल्लीबजार झ्यारखानाय् यंकूगु दु । न्यादँया कैद सजाय न्यंकातःम्ह मनाङे आः निदँ व प्यला जेलय् च्वनेमानि ।