आशा सफूकुथिइ शंखधर चर्चा दुगु ग्रन्थ लुइकल
येँ (नेपालभाषा टाइम्स)÷ येँया आशा सपूmकुथिइ नेपाल संवत्या प्रवर्तक शंखधर साख्वाःया नां न्ह्यथनातःगु ग्रन्थ लुइकूगु दु । सफूकुथिइ च्वंगु ने.सं. ८३२ या मल्लकालीन ग्रन्थ गरुडपुराण य् शंखधरया नां न्ह्यथनातःगु लूगु खः । थ्व ग्रन्थ स्वसः व झिंनिदँ न्ह्यः च्वयातःगु ग्रन्थ खः ।
शंखधरया नां न्ह्यथनातःगु आःतक ३७८ दँ न्ह्यःया ग्रन्थ लुइकातःगु दु । राष्ट्रिय अभिलेखालयय् च्वंगु ने.सं. ७६६ या वशिष्ठलिङ्ग उपपुराण आःतकया लूगु दकलय् पुलांगु शंखधरया नां न्ह्यथनातःगु ग्रन्थ खः । थुकिया लिसें आःतक ख्वप जेलांत्वाःया शंख्वा संवत् ८२७ या ल्वहंपतिइ, जातकपरिपाटी (नेसं ८६४) व रत्नमालाटीका (नेसं ८३०) य् जक शंखधरया नां उल्लेख जुयाच्वंगु लुइकूगु दु ।
सफूकुथिया पुस्तकालयाध्यक्ष शरद कसां थ्व ग्रन्थ आशा सफूकुथिइ न्हापां निसें दुगु खःसां आः जक शंखधर नां उल्लेख जुयाच्वंगु लूगु खँ धयादीगु दु ।
थ्व गरुडपुराणया समाप्तिवाक्यय् शंखधरया नां थुकथं न्ह्यथनातःगु — नेपाल शंखधल अङ्के ८३२ वैशाखमासे शुक्लपक्षे दशम्यान्तिथौ अङ्गारवासरे, एतद्दिने आदि महापुराण गारुड रेखितं श्वतछेया श्रीरावुत्त विश्वसिंहस्यात्मज श्रीरावुत्त मोहनसिंहराम इदं पुराणं शुभमस्तु ।। श्रीरामनारायनः ।।
आशा सपूmकुथिइ संग्रह जुयाच्वंगु गरुडपुराण विश्वसिंहया काय् मोहनसिंह रावुत्तं ल्ह्ययातःगु खः । इपिं श्वतछेँ धाःथाय् च्वंपिं खः ।
LEAVE YOUR COMMENTS