चीनय् जुगु बौद्ध सम्मेलनय् महासचिव बज्राचार्यं ब्वति कयादिल

येँ, (रासस)- जःलाखःला देय् चीनया मिङ्गो शहरय् जूगु खुक्वःगु अन्तर्राष्ट्रिय बौद्ध सम्मेलनय् धर्मोदय सभाया महासचिव सागरमान बज्राचार्य व लुम्बिनी विकास कोषया उपाध्यक्ष ल्हारक्याब लामां ब्वति कयादीगु दु । सम्मेलनय् नेपाली प्रतिनिधिमण्डलया पाखें महासचिव बज्राचार्यं ‘बज्रयानय् पञ्चबुद्ध’ विषयय् ज्यापौ न्ह्यब्वयादीगु खः । ज्यापौ न्ह्यब्वयेगु झ्वलय् वय्कलं भवगवान् बुद्ध जन्म जूगु पवित्र भूमि नेपालय् जीवनय् छक्वः पलाः तया थःगु जीवन सार्थक यायेत नं सहभागी देय्या प्रतिनिधितयत आह्वान यानादिल । उगु सम्मेलन अक्टुवर १४ य् न्ह्याना १९य् क्वचाःगु खः ।