श्रेष्ठ विरुद्ध राष्ट्र बैंकया छगू पुचः अतिकं सक्रिय

येँ – नेपाल राष्ट्र बैंकया न्हूम्ह गभर्नर ल्ययेगु ई न्ह्यःने थ्यंलिसे थुकिया दावेदारतय् दथुइ छम्हं मेम्हेसित द्वपं बियाः प्रतिस्पर्धां पिने लाकेगु खेल नं शुरु जूगु दु । थ्व झ्वलय् थीथी कथं सञ्चार माध्यमतय्त प्रयोग यायेगु ज्या नं जुयाच्वंगु खने दया वःगु दु । थ्व झ्वलय् आः जुइगु गभर्नरया धेंधेंबल्लाःया छम्ह दावेदार जुयाच्वंम्ह वर्तमान डेपुटी गभर्नर चिन्तामणि शिवाकोटीं पुचः हे दयेकाः मेम्ह डेपुटी गभर्नर शिवराज श्रेष्ठ विरुद्ध अभियान न्ह्याकाच्वंगु सीदुगु दु ।

थ्व ज्याय् शिवाकोटीयात राष्ट्र बैंकया बोर्ड दुजः डा. सुवोध कर्णं नं साथ बियाच्वंगु खँ सीदुगु दु । थ्व झ्वलय् डा कर्णं बोर्ड बैठकय् जुइगु गुलिखे गोप्य निर्णय तकं सार्वजनिक यानाच्वंगु खँ नं सीदुगु दु । राष्ट्र बैंकया गोप्य खँ तकं सार्वजनिक याःगु खँयात कयाः बैंकया कर्मचारीतय्सं आपत्ति प्वंका हःगु दु ।

थ्वहे पुचलं छुं ई न्ह्यः येँनं पिहां वइगु छगू राष्ट्रिय दैनिकय् डेपुटी गभर्नर श्रेष्ठया विरुद्ध ताःहाकः समाचार च्वकूगु खँ सीदुगु दु । उगु समाचारय् श्रेष्ठ विरुद्ध अमुक मनूतय्सं सम्पत्ति शुद्धीकरण आयोगय् छु छु द्वपं बियाः उजुरी तःगु खः धइगु खँ तकं च्वयातःगु दु । थुकिं यानाः आयोगय् अज्याःगु रिपोर्ट तयेगु ज्या शिवाकोटी पुचलं हे याःगु खः धइगु पुष्टि जूगु खँ सूत्रं धाःगु दु ।

अमुक मनूतय्सं श्रेष्ठ विरुद्ध थीथी उजुरी तःगु खःसां अज्याःगु छुं हे उजुरी पुष्टि जुइ मफुगु कारणं यानाः हे श्रेष्ठयात मन्त्रिपरिषदं सफाइ बिउगु खः । सूत्रं धाः कथं श्रेष्ठ विरुद्ध अज्याःगु छुं छानबिन यायेगु खःसा सम्पत्ति शुद्धीकरण आयोगं जक याःसां गाःगुली उकियात गम्भीर मुद्दा दयेकेगु गलत उद्देश्यं मन्त्रिपरिषद् तक यंकूगु खः । तर अनं नं श्रेष्ठयात क्लिन चिट् प्राप्त जूगु खः ।

‘द्वपं फुक्क हे गलत’

न्हूम्ह गभर्नरया दौडय् न्ह्यःने दीम्ह डेपुटी गभर्नर शिवराज श्रेष्ठं थौंकन्हय् थःगु विरुद्ध छुं पत्रपत्रिकाय् पिहां वयाच्वंगु खँयात सरकारं हे गलत खः धकाः पुष्टि यायेधुंकूगुलिं उकियात कयाः थम्हं छुं प्रतिक्रिया बियाच्वने म्वाःगु खँ कनादीगु दु । थःगु विरुद्ध छु छु द्वपं बियाः उजुरी दर्ता याःगु खः व फुक्क हे द्वपं गलत खः धकाः सरकारं हे धाःगुलिं आः उपिं मिडियाय् ब्वाँय् जुयाच्वंगु खँ ‘नेपालभाषा टाइम्स’ यात कनादिल । सरकारय् थःगु कडा पकड दु धकाः वःगु द्वपंयात कयाः वय्कलं धयादी, ‘जिगु धाथें उलि पडक दुगु खःसा ला निलम्बन हे याइ मखु नि ।’

सम्बन्धित बुखँ

LEAVE YOUR COMMENTS