ने. सं. ११४६ बछलाथ्व पञ्चमी - दयावीरसिं बुदिं

सीसीएमसीयात स्वनिगःया मेयरपिनि सुझाव : सुलाः सुलाः दुहांवइपिंत कारवाही या

येँ (नेपालभाषा टाइम्स) – उपत्यका नगरपालिका फोरमं स्वनिगलय् सुलाः सुलाः दुहां वइपिंत कारवाहीया दायराय् हयेत माग याःगु दु। कोभिड-१९ संकट व्यवस्थापन केन्द्र ‘सीसीएमसी’ या संयोजक उपप्रधानमन्त्री व रक्षामन्त्री ईश्वर पोखरेलयात नाप लानाः फोरमया पदाधिकारीपिंसं थ्व माग याःगु खः ।

म्हिगः फोरमया अध्यक्ष लिसे येँ महानगरपालिकाया मेयर विद्यासुन्दर शाक्य व फोरमया सचिव लिसें थिमि नगरपालिकाया मदनसुन्दर श्रेष्ठं मन्त्री पोखरेलयात नापलानादीगु खः । येँ महानगरपालिकाया मेयर विद्यासुन्दर शाक्यं पोखरलयात नापलायेगु झ्वलय् थःपिंसं सुलाः सुलाः स्वनिगलय् मनूत वयाच्वंगु व उकिया कारणं यानाः स्वनिगलय् समुदायस्तरय् कोरोना संक्रमणया खतरा ब्वलंगुलिं सुलाः सुलाः दुहां वइपिंत कारबाहीया दायरा हयेगु व्यवस्था यायेत माग यानागु खँ कनादीगु दु ।

मन्त्री पोखरेललिसे जूगु सहलहया झ्वलय् मेयर शाक्यं स्वनिगलय् समुदायस्तरय् संक्रमणया खतरायात ध्यानय् तयाः सरकारया विरोध वा समर्थनय् पिकाइगु र्‍याली, भेला, अनसन, जुलुस आदिइ कडा यायेत नं थःपिसं सुझाव बियागु खँ कनादीगु दु। मेयर शाक्य धयादी, ‘जात्रा पर्व न्यायेकेगु झ्वलय् भीडभाड मजुइ कथं जक न्यायेकेत थःपिंसं स्थानीय जनतायात आह्वान यायेधुनागु दु। लिसें सरकारया समर्थन व विरोधया नामय् जुइगु जुलुस व अनसन लगायतया ज्यां संक्रमणया खतरा अप्वइगु जूगुलिं उकियात पनेत जिमिसं सुझाव बियागु खः ।’

मेयर शाक्यया कथं स्वनिगःया घनावस्ती दुगु क्षेत्रय् कोरोना समुदायस्तरय् थ्यने फइगु खतरा दु। उकिं स्वनिगः दुहां वइगु नाकाय् कडाइ यायेत थःपिसं उपप्रधानमन्त्रीयात इनाप यानागु खँ धयादिसें धयादी, ‘जिमिसं स्वनिगःवासीया मागया बारे जानकारी याकागु दु। मन्त्रीजुं जिमिगु सुझावयात सकारात्मक रुपं कयादीगु दु। लिसे म्हिगः हे सीसीएमसीया बैठक सःताः थ्व विषयय् गम्भीरपूर्वक सहलह यायेगु प्रतिबद्धता प्वंकादीगु दु।’

उकथं हे फोरमया सचिव लिसे थिमि नगरपालिकाया प्रमुख श्रेष्ठं सार्वजनिक यातायात पूर्ण रुपं सञ्चालन जुइधुंकाः संक्रमणया ल्याः अप्वयाः वनाच्वंगु धासें यातायात पूर्ण रुपं स्ववाः तक पनेमाःगु सुझाव थम्हं बियागु खँ कनादिल । फोरमं कोरोना संक्रमण न्यना वनाच्वंगु इलय् सामाजिक सुरक्षा भत्ताया नवीकरणया निंतिं ज्याथ-जिथिपिं छेँ नं पिहां वयेमाःगु अवस्था ब्वलनिगु व थज्याःगु इलय् ज्याथजिथिपिंत खतरा अप्वइगु जूगुलिं नवीकरण यायेगु ई थप यायेत नं सरकारयात इनाप याःगु दु ।

थ्वहे झ्वलय् स्वनिगः नगरपालिका फोरमया बैठक थौं च्वनीगु जूगु दु। थौंया बैठकय् आः वइगु स्थितियात कयाः सहलह यायेगु लिसें आवश्यक जुल धाःसा स्वनिगःया कोरोना प्रभावित क्षेत्रय् लकडाउन यायेमालीगु बारे सहलह जुइगु खँ धाःगु दु ।