ने. सं. ११४४ ञलाथ्व नवमी -

संघ उपनायक गुणघोष महास्थविरयात आक्रमण

येँ (नेपालभाषा टाइम्स)- नेपाःया थेरवाद भिक्षुमध्ये निम्हम्ह थकालीम्ह भिक्षु उपसंघनायक श्रद्धेय भिक्षु गुणघोष महास्थविरयात आक्रमण याःगु दु । वंगु भदौ ६ थते विहीवाः वसपोलयात खुँतय्सं दायाः घाःपाः याना बिउगु खः ।
धौख्यःस्थित पूर्वाराम विहारया प्रमुख जुया बिज्यानाच्वंम्ह ८४ दँया ज्याथःम्ह भिक्षुयात विहारय् हे याकःचा च्वनाच्वंगु इलय् खुँतय्सं दायाः लुटे याना यंकूगु खः । खुँतय् आक्रमणया कारणं वसपोलयात ख्वालय् व मिखाय् बांमलाक चोट लाःगु खः ।

वयां लिपा वसपोल धौख्यलय् हे च्वंगु धुलिखेल मेडिकल अस्पतालय् भर्ना यानाः वासः याकाच्वना बिज्याःगु खः । खुँतय् आक्रमणया कारणं वसपोलया ख्वालय् वँचुक दाम दुगु नापं मिखाय् नं बांमलाक घाः जुयाच्वंगु अस्पताल प्रशासनं जानकारी बिउगु दु । छ्यनय् नं आपालं घाः खनेदुगुलिं अस्पतालया आइसीयुलय् वासः याकाच्वना बिज्याःम्ह वसपोलयात सुयातं नाप लाके बियातःगु मदु ।

बुद्ध विहार भृकुटी मण्डपं छगू विज्ञप्ति जारी यासें गुणघोष महास्थविरयात जूगु आक्रमणया भत्र्सना याःगु दु । भगवान बुद्धया उपदेशयात अनुशरण यानाः ध्यान व ज्ञानया अभ्यास यानाच्वंम्ह भिक्षुयात याकःचा च्वनाच्वंगु इलय् दायाः घाःपाः याःगु सामान्य अपराध मखु धासें विज्ञप्तिइ थज्याःगु घटनां बुद्धभूमि नेपालय् हे भिक्षुपिं असुरक्षित धयाग सन्देश विश्वय् वनेफुगु संवेदनशी घटनाया दोषीयात याकनं ज्वनाः कारवाही यायेत माग यानातःगु दु ।
अथेहे धौख्यःया यक्व सरकारी ज्याकू दुगु आवासीय क्षेत्रय् हे थज्याःगु घटना जूगुलिं शान्ति सुरक्षाया अवस्था तसकं कमजोर व दयनीय जूगु छर्लङ जूगु खँ वक्तव्य धयातःगु दु । वक्तव्यय् उपसंघनायक गुणघोषया उपचारया जिम्मा सरकारं हे कायेमाःगु माग नं यानातःगु दु ।