
येँ (नेपालभाषा टाइम्स)- सर्वोच्च अदालतं पुलांम्ह मन्त्री लिसें छगू इलय् नेपाली कांग्रेस दुनेया शक्तिशाली नेता गोविन्दराज जोशीयात भ्रष्टाचार मुद्दाय् दोषी ठहर याःगु दु । म्हिगः न्यायाधीशपिं विनोद शर्मा व बालकृष्ण ढकालया मंकाः इजलासं जोशीया पुनरावेदनय् दाबी मगाःगु धासें वय्कःयात दोषी ठहर यायेगु फैसला न्यंकूगु खः ।
सर्वोच्च अदालतं अकुत सम्पत्ति कमे याःगु द्वपनय् जोशीयात दोषी ठहर याःगु खः । सर्वोच्च अदालतं २०८१ असार २० गते निगुलिं पक्षया सुनुवाइ क्वचायेकाः निसु क्वःछिउगु खः । न्हापांगु निसुइ फैसला मजुइवं म्हिगः निसु क्वःछिउगु खःसा सर्वोच्चं जोशीयात भ्रष्टाचार ठहर याःगु खः ।
अख्तियार दुरुपयोग अनुसन्धान आयोगं २०६० सालय् पुलांम्ह मन्त्री जोशी विरुद्ध गैरकानुनी सम्पत्ति कमे याःगु द्वपनय् भ्रष्टाचार मुद्दा दायर याःगु खः । सर्वोच्चं जोशीया हकय् ६९ लाख १५ हजार तका दां बं पुइकूगु दुसा ९ महिना कैदया फैसला नं न्यंकूगु दु । विशेष अदालतया फैसला विरुद्ध जोशीं २०६९ फागुनय् सर्वोच्च अदालतय् पुनरावेदन निवेदन बिउगु खः । विशेष अदालतं जोशीयात भ्रष्टाचारी ठहर यायेधुंकाः सर्वोच्च वंगु खः ।
विशेष अदालतया तत्कालीन अध्यक्ष गौरीबहादुर कार्की, दुजःपिं ओमप्रकाश मित्र व केदारप्रसाद चालिसेया इजलासं २०६९ साउन १० गते जोशीयात भ्रष्टाचारया द्वपनय् दोषी ठहर याःगु खः । जोशीं गैरकानुनी रुपय् भ्रष्टाचार यानाः कमे याःगु ठहर सहित २ करोड १६ लाख १४ हजार ३७६ तका दां जफत यानाः उलि हे दां बं पुइकेगु फैसला याःगु खः । जोशी गिरिजाप्रसाद कोइरालाया पालय् कांग्रेसया शक्तिशाली नेता खः ।
पूर्वमुख्यसचिवयात धरौटी
विशेष अदालतं भ्रष्टाचारया मुद्दा लानाः निलम्बनय् लाःम्ह मुख्यसचिव बैकुण्ठ अर्यालयात धरौटीइ त्वःतेत आदेश बिउगु दु । विशेष अदालतया अध्यक्ष टेकनारायण कुँवर, न्यायाधीशपिं रामबहादुर थापा व रितेन्द्र थापाया इजलासं अर्यालया बयान लिपा धरौटीइ त्वःतेत आदेश बिउगु खः । अन्तःशुल्क स्टिकरया भ्रष्टाचार मुद्दाय् अर्याल दोषी ठहर जूगु खः । थ्व मुद्दाय् अर्याल म्हिगः अदालतय् उपस्थित जूगु खः । तत्कालीन मुख्यसचिव सहित झिंछम्हेसिया विरुद्ध अख्तियार दुरुपयोग अनुसन्धान आयोगं मुद्दा दर्ता याःगु खः ।
LEAVE YOUR COMMENTS