येँ पत्रकारतय् सपथ व भिंतुना देछा

येँ(नेपालभाषा टाइम्स)-नेवाः पत्रकार राष्ट्रिय दबू येँ जिल्लाया नवनिर्वाचित पदाधिकारीतय् सपथ ग्रहण व दसिपौ लःल्हायेगु ज्याझ्वः वंगु मंगलवाः जुल । उगु इलय् प्रतिनिधि व प्रदेशसभाय् निर्वाचित सांसदतय्त भिंतुना नं देछाःगु खः । ज्याझ्वलय् दबूया मूछ्याञ्जेनापं निर्वाचन समितिया संयोजक सुनिल महर्जन व दुजः केके मानन्धरं येँ जिल्लाया नवनिर्वाचित पदाधिकारीपिंत सपथ ग्रहणलिसें दसिपौ लःल्हानादीगु खः ।

उगु ज्याझ्वलय् येँ क्षेत्र नं ८ पाखें प्रतिनिधिसभा सदस्यय् निर्वाचित विराजभक्त श्रेष्ठ, येँ क्षेत्र नं ७ (१)पाखें बागमति प्रदेशसभा सदस्यय् निर्वाचित वसन्तप्रसाद मानन्धर, येँ क्षेत्र नं. ८ (१) पाखे निर्वाचित शैलेन्द्रमान वज्राचार्य, येँ क्षेत्र नं ८ (२)पाखें निर्वाचित उद्धव थापा, येँ क्षेत्र नं. ९ (१)या नुरज वज्राचार्ययात नेवाः परम्पराकथं ख्यें सगं बियाः खादा क्वखायेकाः भिंतुना देछाःगु खः ।

दबूया येँ जिल्लाया नवनिर्वाचित नायः अर्विन्द्रमान सिंहया सभापतित्वय् न्ह्याःगु ज्याझ्वलय् प्रतिनिधिसभा सदस्य श्रेष्ठ, प्रदेशसभा सदस्यद्वय मानन्धर व वज्राचार्यं मातृभाषा पत्रकारिताया विकासया निंतिं थःथःगु थासं फक्व ग्वाहालि यायेगु प्रतिवद्धता प्वंकादीगु खः । लिसें वय्कःपिंसं भाषा, संस्कृति, सम्पदा संरक्षण, नेपालभाषा पत्रकारिताया विकासलिसें समावेशी पत्रकारिताया विकासया निंतिं प्रदेशपाखें फक्व ग्वाहालि यायेगु जुइ धयादिल । वंगु पुस २ गते जूगु दबूया येँ जिल्लाया अधिवेशनं सिंहया अध्यक्षताय् झिंस्वम्हेसिया न्हूगु ज्यासना पुचः ल्यःगु खः।