नो भेहिकल विरुद्ध प्रदर्शन

येँ (नेपालभाषा टाइम्स)-न्हूसतक थेंज्याःगु लागाय् सवारी साधन प्रवेश निषेध यायेगु धकाः येँ महानगरपालिकां हःगु ग्वसाःयात न्हूसतकया स्थानीयवासीतय्सं विरोध याःगु दु । मनपाया थ्व ग्वसाःया विरोध यासें म्हिगः न्हूसतकया स्थानीय व्यवसायी व छेँथुवाःतय्सं न्हूसतक लागाय् ब्यानर ब्वयाः प्रदर्शन याःगु खः ।

व्यवसायीतय्सं न्हूसतक धइगु गाडी ब्वाकेत हे दयेकूगु खः, न्हूसतकय् गाडी बन्द याये दइ मखु, न्हूसतक येँया मू बजाः खः धकाः च्वयातःगु पम्प्लेट ब्वयाः शान्तिपूर्ण प्रदर्शन याःगु खः ।
न्हूसतकया पीडितया व्यवसायी– तय्सं वंगु छुं ई न्ह्यः मनपां न्हूसतक लागाय् पार्किङ निषेध याना बीवं थःपिनि ब्यापार घटे जूगु खँ कंगु दु । पार्किङ छक्वः हटे यायेवं सुनसान जूवंगु न्हूसतकय् आः सवारी साधन हे बन्द याना बिल धाःसा थ्व बजाः ठप्प हे जुइगु चिउताः उमिसं प्वंकूगु दु ।

न्हूसतकया पार्किङ चीका बीवं धरहराय् पार्किङ यायेगु व्यवस्था मनपां याःगु खः । शुरुइ अन पार्किङ याइपिं ग्वाःग्वाः दुगु खःसां आः अन पार्किङ याः वइपिनि चाप म्हो जुजुं वनाच्वंगु खँ धाःगु दु । धरहराय् पार्किङया चाप म्हो जुल धइगुया अर्थ आः मनूत न्हूसतक लागाय् हे वयेगु कम जुया वंगुया संकेत जूगु खँ नं व्यवसायीतय्सं धाःगु दु ।

येँ मनपाया मेयर बालेन साहं वंघः लागाया न्हूसतकय् पेटी तब्या यायेत स्वःगु कुतः विफल जुइवं तंया झोंकय् न्हूसतकया फुक्क हे लागाय् सवारी साधन बन्द याकेगु धइगु योजना न्ह्यःने हयादीगु खः । वय्कःया उगु योजनायात मनपाया वडा अध्यक्षतय्सं विरोध यायेवं मेयर साहं थुकिया बारे छलफल तकं याके मबीगु कुतः यानादीगु खः । मनपा बोर्डय् तकं छलफल मयाकुसे छक्वलं नगर परिषद्य् प्रस्ताव हल धकाः वडा अध्यक्षतय्सं विरोध यायेवं मेयर साहं परिषद्या बैठक हे स्थगित यानाः विदेश भ्रमणय् वना बिउगु खः । वय्कः आः ब्राजिलय् वनाच्वंगु दु । वय्कःया थ्व स्वेच्छाचारी विरुद्ध आः फुक्कं वडा अध्यक्षतय्सं छप्पँ जुयाः प्रतिकार यायेत्यंगु खँ धाःगु दु ।