येँय् झिगू थासय् मतगणना
येँ (नेपालभाषा टाइम्स)÷येँय १० गू निर्वाचन क्षेत्रया मतगणना बिस्कं बिस्कं झिगू हे थासय् जुयाच्वंगु खँ जिल्ला निर्वाचन कार्यालयं धाःगु दु । मतगणना जुइगु फुक्कं थासय् सुरक्षाया नितिं तारजाली व सीसीटिभी जडान यानातःगु दु ।
येँ क्षेत्र नम्बर १ या मतगणना अन्तर्राष्ट्रिय सम्मेलन केन्द्र न्हू वानेश्वरय् जुयाच्वंगु दुसा क्षेत्र नम्बर २ राधाकृष्ण मन्दिर थलीइ, क्षेत्र नं. ३ या चामुण्डा स्कुल जोरपाटी, क्षेत्र नम्बर ४ या चपलीस्थित जेष्ठ नागरिक भवनय् मतगणना जुयाच्वंगु जानकारी जिल्ला निर्वाचन अधिकारी ठाकुरप्रसाद भट्टराईं कनादीगु दु ।
अथे हे क्षेत्र नम्बर ५ या टोखाया श्रीसमाज भवनय्, क्षेत्र नम्बर ६ या धर्मस्थली व क्षेत्र नम्बर ७ या मतगणना बालाजुइ च्वंगु जुडो हलय्, क्षेत्र नम्बर ८ या स्वयम्भूया गीतामाता स्कुलय्, क्षेत्र नम्बर ९ या नेपाल पर्यटन तथा होटल व्यवस्थापन प्रतिष्ठान रवि भवनय् व क्षेत्र नम्बर १० या मतगणना त्रिभुवन विश्वविद्यालयया स्मृति भवनय् जुयाच्वंगु दु ।
न्हापा न्हापा येँया भृकुटीमण्डपय् जिल्लान्यंकंया मतगणना जुइगु खः ।
LEAVE YOUR COMMENTS