नीलबाराहीया श्रमदाता धर्नाय्

थिमि/ मध्यपुर थिमि नगरपालिका वडा ९ स्थित ऐतिहासिक नीलवाराही द्यः संरक्षणया निंतिं स्वतःस्फूर्त रुपं जन श्रमदान बिया वयाच्वंपिं लिपांगु इलय् धर्नाय् च्वनाच्वंगु दु । नीलवाराहीस्थित नीलवाराही द्यः संरक्षणया निंतिं मदिक्क श्रमदान याना वयाच्वंपिं श्रमदातात वंगु सोमवाःनिसें २४ घण्टा धर्नाय् च्वनाच्वंगु दु ।
चाँगुनारायण नगरपालिका वडा नं. २या दुवाकोट लिक्कं च्वंगु दुवाकोट प्रहरी प्रभागय् श्रमदान याना वयाच्वंपिं धर्नाय् च्वनाच्वंगु खः । नीलवाराही संंरक्षण अभियानय् श्रमदानया झ्वलय् वंगु सोमवाः प्रयोग जूगु डोजर प्रहरीं नियन्त्रणय् कायेवं इपिं धर्नाय् च्वनाच्वंगु खँ अभियानया सचिव अभियन्ता अनिश वैद्यं कनादिल ।
श्रमदानया झ्वलय् प्रयोग जूगु डोजर प्रहरीं नियन्त्रणय् कायेवं सोमवाः सनिलंनिसें श्रमदातात धर्नाय् च्वंगु खःसा मंगलवाः नं चछि हे धर्नाय् च्वनाच्वंगु सचिव वैद्यं कनादीगु दु । प्रहरीं कयातःगु डोजरया ताःचा लित मबिउतले व डोजर यंके मबिउतले धर्नाय् च्वनाच्वनेगु इमिसं धाःगु दु ।
थुखे प्रहरीं धाःसा डोजरया ताःचा चाँगुनारायण नगरपालिकायात लःल्हायेधुंगुलिं थःपिंसं ताःचा लित बी मफइगु खँ धाःगु दु ।
वंगु स्वला न्ह्यवंनिसें नीलवाराही देगः संरक्षणया निंतिं स्थानीय वासिन्दा, श्रद्धालु भक्तजन, नेवाः देय् दबूलिसें थीथी खलः, पुचः संघसंस्थां जनश्रमदान बिया वयाच्वंगु दु । थ्व झ्वलय् नीलवाराहीइ चले यानाच्वंगु डोजर प्रहरीं नियन्त्रणय् काःगु खः । लिपा उगु डोजर चागुनारायण नगपालिका २ वडा दुवाकोटया चौकीइ यंकूगु खः ।
नीलवाराही संरक्षणया निंतिं चलखं दुना वयेत्यंगु संरचना (ड्याम) बचे यायेत चा द्वँ चिनेत चले यानाच्वंगु जेसीबी मेशिन नियन्त्रणय् काःगुलिं थःपिं बाध्य जुयाः धर्नाय् च्वँच्वनागु अभियानया सहसचिव निशुल प्रजापतिं कनादिल । वय्‌कलं प्रहरी मौखिक उजुरी धकाः सोमवाः सनिलय् डोजर नियन्त्रणय् काःगु नं धयादीगु दु ।
जिल्लाया हे ऐतिहासिक, धार्मिक, सांस्कृतिक महत्वया नीलवाराही देगः व द्यःयाथाय् तक वनेगु लँ चलखं जोखिमय् लायेवं संरक्षणया निंतिं अभियान न्ह्यानाच्वंगु खःसा थ्व झ्वलय् अभियान, स्थानीय वासिन्दा व नगरपालिकाया दथुइ विवाद जुयाच्वंगु दु ।