अमेरिकां सन्दीपयात भिसा मबिल

येँ (नेपालभाषा टाइम्स)- बलात्कारया मुद्दाया नकतिनि जक उच्च अदालतं सफाइ बिउम्ह क्रिकेट कासामि सन्दीप लामिछानेयात अमेरिकां भिसा बीत अस्वीकार याःगु दु । लामिछानें विश्वकप म्हितेत अमेरिका वनेगु निंतिं भिसाया आवेदन याःगु खः, तर नेपाःस्थित अमेरिकी दूतावासं वयात भिसा बीत अस्वीकार याःगु खः ।

सन्दीपं म्हिगः सामाजिक सञ्जालय् छगू पोष्ट यासें थःत भिसा मबिउगु जानकारी बिउगु खः । अमेरिका व वेष्टइन्डिजय् जुइगु टी–२० विश्वकप म्हितेगु निंतिं मेपिं कासामि अमेरिकाय् थ्यनेधुंकूगु दु । बलात्कारया मुद्दाय् उच्च अदालतं सफाइ बीवं सन्दीपयात नेपाल क्रिकेट संघं नेपाःया टिमय् दुथ्याकेधुंकूगु दु । तर अमेरिकां भिसा मबीवं सन्दीपं अमेरिकाय् जुइगु कासा म्हितेमखनीगु जूगु दु । नेपालं म्हितीगु समूह चरणया निगू कासा अमेरिकाय् जुइसा निगू कासा वेस्ट इण्डिजय् जुइ ।

अमेरिकी दूतावासं सन्दीपया भिसा अस्वीकृत याःसां थुकिया कारण बारे धाःसा जानकारी बिउगु मदु । दूतावासं विश्वकप म्हितःवंपिं नेपाली टिमयात भिंतुना देछाःगु दु, तर सन्दीपया भिसायात कयाः धाःसा टिप्पणी यायेत अस्वीकार याःगु दु ।

दूतावासं अमेरिकी कानुन कथं भिसा सम्बन्धी छुं नं खँ सार्वजनिक याये मदइगु जूगुलिं छाय् भिसा अस्वीकृत जुल धयागु बारे जानकारी बीफइमखु धाःगु दु । दूतावासं जानकारी बीत अस्वीकार याःसां सन्दीपयात बलात्कारया मुद्दा लाःगु कारणं हे भिसा मबिउगु अनुमान दु । उच्च अदालतं सफाइ बिउसां थ्व मुद्दा अझ सर्वोच्च पुनरावेदनया निंतिं वनीगु सम्भावना दनी । उकिं सन्दीप थ्व मुद्दाय् सन्दीप पूवंक निर्दोष सावित जूगु मदुनि । मेखे अमेरिकां मानवअधिकार व बलात्कार थेंज्याःगु मुद्दायात विशेष ध्यान बीगु जूगुलिं नं सन्दीपयात भिसा मबिउगु अनुमान दु ।