शैलेन्द्रपाखें मुख्यमन्त्री दावी?
येँ (नेपालभाषा टाइम्स)- बागमती प्रदेशय् अल्पमतय् लाःम्ह मुख्यमन्त्री शालिकराम जम्कट्टेलं सरकार बचे यायेगु लागिं हानं न्हूगु कुतः शुरु याःगु दुसा थ्वहे इलय् सरकार दयेकेगु ज्याय् निर्णायक जुयाच्वंम्ह ‘हाम्रो नेपाली पार्टी’ या सांसद शैलेन्द्र वज्राचार्यं मन्त्री सिबें नं मुख्यमन्त्री पदय् दावी यायेगु तयारी यानाच्वंगु खँ सीदुगु दु ।
बागमती प्रदेशय् दुगु ७ गू दल मध्ये थौंकन्हय् एमाले, माओवादी व नेकपा (एस) या औपचारिक गठबन्धन जुइधुंकूगु दु । तर सरकार दयेकेत थुलि जक पार्टी जानाः मगाः । ११० सिट दुगु प्रदेशसभाय् सरकार दयेकेत ५६ सिट माः । तर थ्व स्वंगू दलयाके ५५ सिट जक दु । उकिं हाम्रो नेपाली पार्टीया २ सिट मदयेक मगाः । गठबन्धनया दलतय्सं हाम्रो नेपाली पार्टीया संसदीय दलया नेता शैलेन्द्र वज्राचार्ययात सरकारय् वयेत इनाप यासें न्ह्यागु मन्त्रालय काःसां जिउ धकाः ‘अफर’ यायेधुंकूगु दु । तर वज्राचार्यं थःगु पार्टी मदयेके सरकार बने जुइगु सम्भावना मदुगु जुयाः थःपिंत नं मुख्यमन्त्री दयेकेमाः धकाः दावी याःगु खँ सीदुगु दु । यदि तःधंगु दलतय्सं पालंपाः मुख्यमन्त्री जुइगु सहमति यात धाःसा थःत नं उकी दुथ्याकेमाः धासें न्हापांगु पाः थःत बीमाः धकाः नं वय्कलं दावी यानादीगु खँ सूत्रतय्सं धाःगु दु ।
थौंकन्हय् वय्कःया पार्टीया बटम लाइन नं थ्वहे जुयाच्वंगु खँ कँसें सूत्रं धाःगु दु– आः शैलेन्द्रजु थःगु लाइनं कुहां वइगु सम्भावना खनेदु । संसदय् फुक्क हे दल चीधंगु जूगुलिं वय्कःया पार्टीयात जक चीधंगु दल धकाः हेपे यायेगु अवस्था मदु । संघय् माओवादी थः हे नं चीधंगु दल जूसां प्रधानमन्त्री जुयाः सरकार चले यानाच्वंगु दु ।
सूत्रतय्सं धाःकथं वज्राचार्यं आः गठबन्धन न्ह्यःने थज्याःगु माग यायेगु तयारी यानाच्वंसां उकियात औपचारिक रुपं निर्णय यायेगु वा न्ह्यःने न्ह्याकेगु ज्या धाःसा मजूनि ।
संघय् कांग्रेसयात वांछ्वयाः एमाले सहित न्हूगु गठबन्धन दयेकेवं बागमती प्रदेशय् नं सरकारय् समावेश जुयाच्वंगु नेपाली कांग्रेसया खुम्ह मन्त्रीं राजीनामा बीवं सरकार संकटय् लाःगु खः । सरकारय् दुथ्याःपिं मन्त्रीतय्सं राजीनामा बियाः सरकारयात बियातःगु समर्थन लित कायेवं आः ३० न्हुया दुने विश्वासया मत कायेमाःगु जूगु दु ।
LEAVE YOUR COMMENTS