जनबहाः द्यःया देगः अस्तव्यस्त
येँ (नेपालभाषा टाइम्स)- येँया नांजाःगु जनबहाः द्यःया देगः सवलीकरण यायेगु ज्याय् ठेकेदार कम्पनीपाखें याःगु लापरवाहीया कारणं देगः व द्यः नितां अस्तव्यस्त अवस्थाय् लानाच्वंगु दु । वंगु २०७२ सालया भुखाचय् लानाः क्षति जूगु थ्व देगः सवलीकरण यायेगु लागिं भारत सरकारं आर्थिक ग्वाहालि याःगु खः । तर सवलीकरणया ठेक्का लाकूगु ठेकेदार कम्पनीं ज्याय् चरम लापर्वाही यानाच्वनं नं नेपाः व भारत निगुलिं देय्या सम्बन्धित निकायतय्सं धाःसा वास्ता मयाःगुलिं जनबहाः द्यःया भक्तजनत आक्रोशित जूगु दु ।
ठेकेदार कम्पनीयात तःक्वः मछि इनाप यानाः नं बांलाक ज्या मयाःगुलिं म्हीगंनिसें अन जुयाच्वंगु सुस्तगतिया ज्यायात नं स्थानीय गुर्जुपिंसं दिकाबिउगु दु । स्थानीय श्री आर्यावलोकितेश्वर सुधार समितिया नायः लिसें कामपा २५ वडाया पुलांम्ह वडाध्यक्ष निलकाजी शाक्यया कथं थुगु देगः सवलीकरणया ज्या वंगु सन् २०२१ या फेब्रुअरी २५ निसें शुरु याःगु खः । सम्झौता कथं २०२३ फेब्रुअरी २४ तारिखय् ज्या सम्पन्न यायेमाःगु खः । तर ज्या सम्पन्न यायेगु मिति स्वयां १३ महिना अप्वः वनेधुंकलं नं सम्पन्न जुइगु सम्भावना धाःसा खने मदुनि । शाक्यया कथं आः तक ४० प्रतिशत ज्या हे सिधःगु खने मदुनि ।
देगः सवलीकरणया ठेक्का प्राकृतिक–सानु सुवाल–पवन (ज्वाइन्ट भेन्चर) पाखें काःगु खः । सवलीकरणया लागिं ६ करोड २६ लाख ६४५ तका लागत तुइगु ल्याःचाः पिकयातःगु दु ।
ठेकेदार कम्पनीं ज्याय् तसकं ढिलासुस्ती याःगुलिं आर्यावलो–कितेश्वर सुधार समिति व ठेकदार कम्पनी दथुइ छुं ई न्ह्यः शहरी विकास तथा भवन निर्माण विभागय् छगू बैठक च्वनाः थुगुसी वैशाख महिनाय् जुइगु जनबहाः द्यःया रथयात्रा क्वचायेवं हे द्यः लितहयाः तप्यंक देगलय् विराजमान याये फइकथं निर्माण सम्पन्न यायेगु धकाः सहमति जूगु खः । अथे धयागु वइगु वि.सं. २०८१ वैशाख ९ गते तकया दुने निर्माण सम्पन्न जुइमाः, मखुसा ठेकेदार कम्पनीयात कारवाही यायेमाः धयागु माग सुधार समितिं न्ह्यःने तःगु दु । तर ठेकेदार कम्पनीं थ्व मागयात स्वीकार मयाःगु कारणं थःपिंसं अन ज्या रोके यानाबियागु खँ नं भाजु शाक्यं कनादिल ।
दँदँ तक देगःया सवलीकरण मजुयाः बहाः छगुलिं अस्तव्यस्त जूगु व द्यःयात नं टहराय् तये माःगुलिं भक्तजनत निराश जुयाच्वंगु खँ वय्कलं कनादीगु दु ।
LEAVE YOUR COMMENTS