
येँ (नेपालभाषा टाइम्स)÷ मांभाय् माध्यमं आखः ब्वंकीगु दकलय् न्हापांगु ब्वनेकुथि जगत सुन्दर ब्वनेकुथिया ३४ क्वःगु बुन्हि वंगु शनिवाः छगू ज्याझ्वःया दथुइ हन ।
मूपाहां लुम्बिनी विश्वविद्यालयया पुलांम्ह उपकुलपति प्रा. डा. हृदयरत्न वज्राचार्यं त्वाःदेवाय् मत च्याकाः न्ह्याःगु उगु ज्याझ्वलय् ब्वनेकुथिइ नीदँतक योगदान बियादीम्ह शिक्षिका सृजना श्रेष्ठयात सभानायः डा. चुन्दा वज्राचार्यं ८० द्वः तकाया चेक व मूपाहां वज्राचार्यं हनापौ लःल्हासें विशेष सम्मान याःगु खः ।
ब्वनेकुथिइ एसईई दकलय् अप्वः ल्याः हःपिं व नेपालभाषाय् दकलय् अप्वः ल्याः हःपिं प्रेणा शाक्य व सिजन खड्गीयात छसिकथं विरन्चि मोतिमाया सिरपाः व शान्ति सिरपाः नं लःल्हायेगु ज्या जूगु खः ।
ब्वनेकुथिया संचालक समितिया नायः डा. चुन्दा वज्राचार्यया सभापतित्वय् जूगु उगु ज्याझ्वलय् ब्वनेकुथिइ दकलय् उत्कृष्ट स्यनामि चैत्यमाया डंगोलयात दां सिरपाः लिसें हनापौ लःल्हाःगु खःसा ब्वनेकुथियात थीथी इलय् थीथी कथं ग्वाहालि याःपिं सकलसितं सुभाय् पौ लःल्हायेगु ज्या जूगु खः ।
ज्याझ्वलय् मूपाहां वज्राचार्य लगायत विशिष्ट पाहां हिकिभा जापानया सातोसि चियोनो, पाहां शोभना मासोका श्रेष्ठ, शान्ति सिरपाःया दाता ज्ञानेन्द्र मानन्धरपिंसं ब्वनेकुथियात कयाः थःपिनि नुगःखँ तयादीगु खःसा सभानायः पाखें मूपाहां व पाहांपिंत मतिनाया चिं लःल्हानादीगु खः । ज्याझ्वः लिपा ब्वनेकुथिया मस्तय्सं थीथी सांस्कृतिक ज्याझ्वः नं न्ह्यब्वःगु खः ।
LEAVE YOUR COMMENTS