ने. सं. ११४४ चौलागा अष्टमी -

ज्यापु महागुथिया छेँ क्वचाइन

येँ (नेपालभाषा टाइम्स)- नेवाः जातिया थीथी भाषिक व जातीय खलः पुचःतय् थःथःगु हे संस्थागत छेँ दनेगु झ्वलय् आः ज्यापु महागुथि नेपाःया छेँ नं दने सिधःगु अवस्थाय् थ्यंगु दु । ज्यापु महागुथिया मू ज्याकू तइगु थ्व छेँ येँ मनपा १५ वडाय् लाःगु वैलोचन तिर्थया लिक्क दनाच्वंगु खः ।

न्यातँजाः दइगु थ्व छेँया निर्माण क्वचायेधुंकूगु दु । आः दुनेया ज्या याये ल्यं दनि । दुने याये मानिगु ज्या समेत याइबलय् थ्व छेँ आः वइगु वि.सं. २०८१ सालया वैशाख तक निर्माण सम्पन्न जुइ फइगु खँ ज्यापु महागुथि नेपाःया छ्यांज्ये मचाराजा महर्जनं कनादीगु दु । थुकियात महागुथिं ‘ज्यापु देय्छेँ’ धकाः नां तःगु दु ।

मुक्कं ३ आना २ पैसा जग्गाय् दनाच्वंगु थ्व छेँया न्हापांगु तँय् न्यनेकने, नितँ जालय् महागुथिया ज्याकू, स्वतँ जालय् मुँज्या हल, प्यतँ जालय् वाचनालय व अध्ययन अनुसन्धान केन्द्र अले न्यातँ जालय् ज्यापु जाति सम्बन्धी संग्रहालय दइगु खँ नं महर्जनं कनादिल ।

महागुथिं चःमति जग्गा एकीकरण आयोजनायाके थ्व जग्गा न्याना काःगु खः । अन छेँ दनेगु लागिं येँ महानगरपालिकां निगू करोड दां ग्वाहालि याःगु दु । वंगु २०८० या जेठ १५ गते येँ मनपाया पुलांम्ह मेयर विद्यासुन्दर शाक्यं थ्व भवनया शिलान्यास यानादीगु खः । महर्जनया कथं थ्व ज्यापु देय्छेँय् ज्यापु महागुथिया ज्याकू लिसें ज्यापु समुदायया इतिहास, संस्कृति, संस्कारया अध्ययन अनुसन्धान, महागुथिया संगठन विस्तार आदि थेंज्याःगु ज्याखँत जुइ ।

नेवाः जातिया भाषिक जातीय खलःपुचःत मध्ये वंगु छुं ई न्ह्यः तिनि नेपालभाषा मंकाः खलः व ख्वपय् विराट नेपालभाषा साहित्य सम्मेलन गुथिया थःगु छेँ दने क्वचाःगु खःसा आः नेवाः देय् दबूया छेँ दनाच्वंगु दु । यलय् ज्यापु समाज, नेपालभाषा मंकाः खलः यल, किपुलिइ नेपालभाषा एकेडेमि, येँय् च्वसापासा, नेपाल लिपि गुथि, नेपालभाषा परिषद् आदि थेंज्याःगु संस्थाया थःथःगु हे भवन दयेधुंकूगु दु ।