सीपिनि नामय् थौं राष्ट्रिय शोक, ३२ म्हेसिया उद्धार

येँ (नेपालभाषा टाइम्स)÷हमासया नियन्त्रणय् दुगु इजरायलया दक्षिण क्षेत्र सेदोत नेगेभं ३२ म्ह नेपाःमियात इजरायली सेनां उद्धार यानाः सुरक्षित थासय् यंकूगु दु । उमित राजधानी तेल अभिभपाखे यंकूगु खः । सुदूरपश्चिम विश्वविद्यालयपाखें ‘लर्न एण्ड अर्न’ कार्यक्रम अन्तर्गत ४९ म्ह नेपाःमि इजरायल वंगु खः । उकी मध्ये झिम्ह हमासया आक्रमणय् लानाः सीगु खः ।

थ्वहे झ्वलय् सरकारं इजरायलय् ज्या यानाच्वंपिं नेपाःमि स्वदेश लिहां वये चाहे जुल धाःसा विमान चार्टर यानाः हयेगु प्रक्रिया न्ह्याकूगु दु । म्हिगः च्वंगु मन्त्रिपरिषद् बैठकं अध्ययन लिसें मेगु ज्या यायेत इजरायलय् दुपिं नेपाःमि नेपाः वये चाहे जूसा नेपाल एयरलाइन्स व हिमालय एयरलाइन्सया विमान चार्टर यानाः नेपाः हयेगु व्यवस्था मिले यायेगु निर्णय याःगु खः ।

नेपाःमितय् उद्धार यायेत इजरायल सरकार व जःलाखःला देय्लिसे समन्वय यायेगु निर्णय नं मन्त्रिपरिषदं याःगु दुसा नेपाः लिहां वये न्ह्याःपिं नेपाःमियात नेपाः लित हये न्ह्यः तक अस्थायी ट्रान्जिट होम स्थापना यानाः व्यवस्थापन यायेगु निर्णय नं याःगु दु ।

उकथं हे इजरालय् नेपाःमि विद्यार्थी स्याःगु घटनायात कयाः थौं देय्न्यंकं राष्ट्रिय शोक घोषणा याःगु दु । थौं देय्न्यंकं सरकारी ज्याकू व विदेशस्थित कुटनीतिक नियोगय् राष्ट्रिय ध्वाँय् बछि क्वछुकेगु घोषणा याःगु खः । सरकारं आतंककारी हमलाय् लानाः सीपिनि छेँजःयात बिचाः हायेकुसें उमि छेँजःयात राहत कथं १० लाख तका बीगु निर्णय नं याःगु दु ।

थ्वहे झ्वलय् म्हिगः इजरायलया सेदोत नेभेगस्थित बंकरय् लानाच्वंपिं नेपाःमि विद्यार्थीलिसे प्रधानमन्त्री पुष्प कमल दाहाल व परराष्ट्र मन्त्री एनपी साउदं टेलिफोनं खँल्हाबल्हा यानादीगु दु । बंकरय् दुम्ह दाङ नारायणपुरया विपिन सुवेदीलिसे प्रम दाहालं फोन वार्ता यानादीगु खः ।

प्रधानमन्त्रीलिसे खँ ल्हायेगु झ्वलय् विपिनं थः व पासापिंसं थ्व इलय् याकनं नेपाः लिहां वयेगु बाहेक मेगु छुं म्वाःगु धासें सरकारयात ग्वाहालि यायेत इनाप यानादीगु खः ।
लिसलय् प्रधानमन्त्री दाहालं इजरायल सरकारया अनुमति वयेवं विमान ब्वयेकेत तयारी अवस्थाय् तइतयागु दु धासें धैर्य यायेत इनाप यानादीगु खः ।
प्रधानमन्त्री स्वयां न्ह्यः परराष्ट्र मन्त्री एनपी साउदं नं विपिनलिसे खँ ल्हानादीगु खः । मन्त्री साउदं इजरायल दूतावासया कर्मचारी सहित सुरक्षाकर्मीपाखे उद्धार जुइगु आश्वासन विपिनयात बिउगु खः ।

थ्वहे झ्वलय् म्हिगः राष्ट्रपति रामचन्द्र पौडेल, नेकपा एमालेया अध्यक्ष केपी शर्मा ओली आदि नेतातय्सं इजरायलय् गाजा क्षेत्रय् लानाच्वंपिं नेपाःमियात कयाः चिउताः प्वंकादीगु दु ।

बंकरय् लानाच्वंपिं नेपाःमि विद्यार्थीतय्सं बंकर दुनें हे भिडियो दयेकाः थःपिंत फसे जुयाच्वना धासें सामाजिक सञ्जालय् पोष्ट यायेवं उमित मालेगु ज्या जूगु खः ।