स्वतन्त्र पत्रकारया महाधिवेशन बन्दीपुरय्
येँ – स्वतन्त्र पत्रकार संघया स्वक्वःगु महाधिवेशन व च्याक्वःगु साधारणसभा तनहुँया दमौलीस्थित पर्यटकीय लागा बन्दीपुरय् जुल । वंगु शनिवाः जूगु ज्याझ्वःया उलेज्या तनहुँ क्षेत्र नं. १ या सांसद कृष्णकुमार श्रेष्ठ ‘किसानं’ यानादीगु खः ।महाधिवेशनया उलेज्या यासें सांसद श्रेष्ठं झण्डै सत्या दँ तक सिनाच्वंगु बन्दीपुर सहर आः वयाः हाकनं पुनःजागृत जूगु न्ह्यथनादिसें आः नीन्यागू जिल्लया स्वतन्त्र पत्रकार मुनां हाकनं छक्वः थ्व थाय्यात पुनःजागरण हयेगु ज्याय् तिबः जू वनीगु विश्वास प्वंकादिल ।
बन्दीपुर गाउँपालिकाया अध्यक्ष पूर्णसिं थापां थःपिंसं बृहत बीस वर्षे योजना दयेकाः बन्दीपुरयात पर्यटकीय गन्तव्यस्थलकथं हे विकासया गतिविधित न्ह्याकाच्वनागु जानकारी बियादिल । तनहुँया प्रमुख जिल्ला अधिकारी भरतकुमार शर्मां स्वतन्त्र रुपं समाचार सम्प्रेषण यायेगु पत्रकारतय् विशेषता खः धयादिल ।
नेकपा तनहुँया प्रतिनिधि राम कार्कीं सांसद विकास कोषया ३० गू लाख तका बजेट बन्दीपुरया सतक मर्मत व तब्या यायेगु ज्या न्ह्यानाच्वंगु जानकारी बियादिल । नेपाली कांग्रेस तनहुँ जिल्ला समितिया सचिव परमेश्वर भट्टराईनं बन्दीपुरया विकासया निंतिं थःपिंसं प्यंगू करोड तका दां चूलाकेत योगदान यानागु खँ कनादिल ।
संघया राष्ट्रिय अध्यक्ष कृष्णप्रसाद आचार्यया सभापतित्वय् उपाध्यक्ष शान्ति रानामगरं लसकुस यानादीगु उलेज्याझ्वलय् संघया न्हूगु ज्यासना पुचः ल्ययेगु निंतिं गठन यानातःगु निर्वाचन कमिटीया संयोजक के.बी. भुसाल, ग्रामिण पर्यटन अभियन्ता सुर्दशन प्रधान, विन्ध्यवासिनी होम स्टेया अध्यक्ष शान्ति कुँवर, संघया केन्द्रीय कोषाध्यक्ष विरेन्द्र पाण्डे, संघया येँ जिल्लाया पुलांम्ह अध्यक्ष केबी सम्राट लगायतं थःथःगु नुगःखँ धयादीगु खः ।
ज्याझ्वलय् सांसद श्रेष्ठं यलया वरिष्ठ पत्रकार रामकृष्ण कर्माचार्ययात ७,५०५÷–तका दांया क्रियाशील राष्ट्रिय स्वतन्त्रता सिरपाः लःल्हानादीगु खःसा पुरस्कृत व्यक्तित्व कर्माचार्यं सिरपाः वापतया ध्यबा संघयात बियादीगु खः । महाधिवेशनं आचार्यया हे नेतृत्वय् न्हूगु राष्ट्रिय ज्यासना पुचः ल्यःगु दु ।
LEAVE YOUR COMMENTS