गौतम बुद्ध विमानस्थल दयेकेज्या क्वचाइन

येँ – गौतम बुद्ध अन्तर्राष्ट्रिय विमानस्थलया धावनमार्ग दयेकेगु ज्या लिपांगु चरणय् थ्यंगु दु । विमानस्थलया ३ हजार मिटर ताःहाकःगु धावनमार्ग वायरिङ व सोल्डरया ज्या क्वचायेधुंकूगु दु । धानवमार्गय् पिच यायेगु ज्या फागुनया अन्त्यपाखे क्वचाइगु खँ धाःगु दु । विमानस्थलय् थ्वहे वइगु असारं निसें परीक्षण उडान यायेगु कथं ज्या जुयाच्वंगु दु ।

विमानस्थलया ७० प्रतिशत ज्या क्वचायेधुंकूगु खँ नागरिक उड्डयन प्राधिकरणं धाःगु दु । विमानस्थलया सुरक्षा मापदण्डया ज्या एरिड्रोम इन्जिनियरिङं यानाच्वंगु दु । उगु मापदण्डयात कयाः आइसीएओं अध्ययन यानाच्वंगु दु । विमानस्थल दयेकेगु ज्या इलय् क्वचायेकेगु निंतिं ठेकदार कम्पनीं तीव्र रुपं ज्या यानाच्वंगु खँ नं प्राधिकरणं धाःगु दु ।

विमानस्थलया ७० प्रतिशत ज्या क्वचायेधुंकूगु खँ नागरिक उड्डयन प्राधिकरणं धाःगु दु ।

थौंकन्हय् विमानस्थलय् पार्किङ, प्रशासनिक भवन, कन्ट्रोल टावर लगायत पूर्वाधार दयेकेगु ज्या जुयाच्वंगु दु । अथेहे हवाई पूर्वाधार व जमिनया पूर्वाधारया ज्या जुयाच्वंगु दु । आयोजना दयेकेगु निंतिं चालु आर्थिक दँया निंतिं ६ अर्ब ८३ करोड बजेट विनियोजना याःगु खः । न्यालाया दुने आयोजनाया ३ अर्ब ३९ करोड खर्च जुइधुंकूगु दु ।

विमानस्थलया टेक्निकलपाखेया ज्याया टेन्डरया ज्या लिपांगु चरणय् थ्यंगु खँ प्राधिकरणं धाःगु दु । सन् २०१७ दुने क्वचायेकेगु कथं विमानस्थल दयेकेगु ज्या न्ह्याःगु खःसा थीथी कारणं यानाः विमानस्थल दयेकेगु ज्या लिबाःगु खः ।

विमानस्थल दयेकेगु ज्या क्वचायेवं अन खुगः अन्तर्राष्ट्रिय जहाज व प्यंगः स्वदेशी जहाज पार्किङ यायेफइगु खँ धाःगु दु । येँया विमानस्थलय् अन्तर्राष्ट्रिय विमानया चाप अप्वयेवं सरकारं निगूगु वैकल्पिक विमानस्थल कथं गौतम बुद्ध विमानस्थल दयेकेगु ज्या न्ह्याकूगु खः ।