डलर थहां वनाः नेपाःया बजाः प्रभावित

येँ – अमेरिकी डलरया तुलनाय् नेपाःया ध्यबा हाकनं कमजोर जुयाः न्हूगु रेकर्ड कायम याःगु दु । नेपाल राष्ट्र बैंकं बुधवाःया निंतिं प्रति १ अमेरिकी डलर बराबर ११७.०७ तका क्वःछिउगु खः । थ्व आः तकया हे उच्च दर खः । अमेरिकी डलर लिसे भारु कमजोर जुइवं उकिया लिच्वः नेपाःया ध्यबाय् लाःगु खः । भारु कमजोर जुयाः १ डलर बराबर ७२.९६ भारु कायम जूगु खः ।

भारु कमजोर जुयाः प्रति अमेरिकी डलर बराबर ७५ भारु थ्यनीगु अनुमान यानातःगु दु । डलरया भाः थहां वंगुलिं आः नेपाः दुहां वइगु रेमिटेन्सया मात्रा नं अप्वइगु व निर्यात यायेगु इलय् उकिया लिच्वः नेपाःया बजारय् सकारात्मक लाइगु खँ धाःगु दु । तर नेपालं निर्यात स्वयां आयात अप्वः याइगु कारणं यानाः नेपाःया बेसाः भाः धाःसा थहां वनाः उकिया प्रत्यक्ष मार नेपाःमि जनतायात लाइगु अनुमान याःगु दु ।

डलरया भाः थहां वंगु कारणं वस्तु व सेवाया भाः थहां वनाः मुद्रास्फीतिइ चाप लाइगु खनेदु । विशष यानाः आयात जुइगु सामानया भाः थहां वनीगु खनेदु । उकिया लिच्वः आः न्ह्यःने वयाच्वंगु मोहनि नखःयात नं लाके फइगु विश्लेषण जुयाच्वंगु दु । डलरया भाः निरन्तर रुपं थहां वनाच्वंगुलिं पेट्रोलियम पदार्थया भाः तःक्वः थहां वनेधुंकूगु दु । गुकिं यानाः ढुवानीया भाः थहां वनाः न्हिथं उपभोग यायेमाःगु सामानया भाः नं थहां वनाच्वंगु दु ।