जुगितय्त सतलं पितिना मछ्वयेत रुक्सानाया निवेदन
येँ (नेपालभाषा टाइम्स)÷नेवाः आन्दोलनया अभियन्ता लिसें आः नकतिनि बिबिसीपाखें विश्वया प्रभावकारी सछिम्ह मिसापिनि धलखय् लाःम्ह मय्जु रुक्साना कपालीं स्वनिगःया नेवाः समाज दुनेया जुगि समुदायया आवास समस्यायात कयाः राष्ट्रिय मानव अधिकार आयोग, आदिवासी जनजाति आयोग व भूमिसुधार मन्त्रालयय् निवेदन बियादीगु दु ।
स्वनिगःया थीथी थासय् च्वंगु सतःयात नं सरकारं थौंकन्हय् फल्चाया रुपय् कासें सार्वजनिक सम्पत्ति कथं दर्ता यायेगु ज्या यानाच्वंगु कारणं अज्याःगु फल्चाय् ऐतिहासिककालंनिसें च्वना वःपिं नेवाः समाजया जुगि समुदाय सुकुम्बासी जुइगु अवस्थाय् थ्यंगु धासें जुगि समुदायया आवास समस्या समाधान यायेत वय्कलं निवेदनय् इनाप यानादीगु दु ।
नेपालय् जुगित लिच्छविकालंनिसें हे अस्तित्वय् दुगु व उपिं न्हापांनिसें हे थीथी त्वाःया सतलय् च्वनीपिं खः । आः सतःयात सार्वजनिक सम्पत्ति धयाहःगुलिं जुगित अज्याःगु सम्पत्ति हड्पे यानाः च्वनाच्वंगु थें खनेदुगु धासें अज्याःगु सतलय् जुगितय्त कानुनी रुपं हे च्वने दइगु व्यवस्था यायेत नं वय्कलं माग यानादीगु दु । सुं नं मनूयात आवासया अधिकारपाखें बञ्चित याये दइ मखु धासें वय्कलं स्वनिगःया जातीय संरचनायात थुइकाः जुगि समुदायया आवास सुरक्षित यायेत नं आग्रह यानादीगु दु ।
LEAVE YOUR COMMENTS