बुद्धजयन्तीया झ्वलय् लुम्बिनीइ ज्याझ्वः

येँ – गौतम बुद्धया जन्मस्थान लुम्बिनीइ वइगु बैशाख १५ गतेनिसें १६ गते तक जुइगु अन्तर्राष्ट्रिय बौद्ध सम्मेलनय् ३८ गू देय्या बौद्ध विद्वानय्सं ब्वति काइगु जूगु दु । थन ग्वसाः ग्वःगु पत्रकार सम्मेलनय् लुम्बिनी विकास कोषया उपाध्यक्ष अवधेशकुमार त्रिपाठीं सम्मेलनय् झिंन्यागू देय्पाखें संस्कृति तथा धार्मिक मामला मन्त्रीसहित २३ देय्या थीथी तहया ब्यक्ति सहभागिता दइगु कनादिसें विगतया सम्मेलनया सन्देश व निष्कर्षयात समीक्षा यानाः कन्हय्या लागिं थप सन्देश बीगु खँ कनादिल ।

ज्याझ्वलय् पुलांम्ह संस्कृतिमन्त्री आनन्दप्रसाद पोखरेलं निदँ न्ह्यः लुम्बिनीं बौद्ध दर्शनया उद्गम थलो खः धइगु खँ स्थापित यायेत ताःलाःगु कनादिसें नेपालय् अन्तर्राष्ट्रिय मानव जातिया आमूल परिवर्तनया लागिं सन्देश न्यंकीगु खँ कनादिल । लुम्बिनी विकास कोषया निमित्त सदस्यसचिव सरोज भट्टराईनं प्रधानमन्त्रीं निदँ न्ह्यः न्याद्वःम्ह न्ह्यनीगु हल दयेकेगु खँ उद्घोष जूगु कनादिल । लुम्विनी विश्वविद्यालयया उपकुलपति प्रा. डा. नरेशमान बज्राचार्यं सम्मेलनय् १६—१६ म्ह विदेशी व स्वदेशी बौद्ध विद्वानं ज्यापौ न्ह्यब्वइगु जानकारी बियादिल ।