नेवाः देय् दबू इटहरी उपमहानगर समितिया न्हापांगु अधिवेशन
येँ – नेवाः देय् दबू इटहरी उपमहानगर समिति, सुनसरीया न्हापांगु अधिवेशन जुल । अधिवेशनया उलेज्या नेवाः देय् दबू १ नम्बर प्रदेशया संयोजक नापं पूर्वाञ्चल उपाध्यक्ष सोमबहादुर श्रेष्ठं त्वाःदेवाय् मत च्याकाः यानादीगु खः । नेवाः पुचःया भवनय् जूगु अधिवेशन उलेज्याझ्वलय् नवासें वय्कलं नेवाःतय्सं थःगु मौलिक लिपि, भाय्, कला, संस्कृति व संस्कार संरक्षणया निंतिं संगठित रुपं न्ह्याः वनेमाःगु खँय् बः बियादिसें आः संघीयता पूर्णरुपं लागू जुइगु अवस्थाय् नेपालभाषाया ख्यलय् लगे जुयाः नं जीवन यापन याये फइ धयादिल ।
देय् दबू सुनसरी जिल्लाया अध्यक्ष तीर्थ मास्कें आदिवासी जनजातिया निंतिं स्थानीय, प्रदेश व केन्द्रपाखें व्यवस्था जुयाच्वंगु बजेटया सदुपयोग यायेगुपाखे स्वयेमाः धयादिल । समितिया नायः चित्रमान प्रधानया सभापतित्वय् जूगु न्हापांगु अधिवेशनय् नेवाः मिसा दबू पूर्वाञ्चलया न्वकु विमला प्रधानं मचाजंक्व, इहिपा, ज्याजंक्वः थेंज्याःगु ज्याय् आः नेवाः पुरोहित हे तयाः याये फइगु अवस्था दुगु जानकारी बियादिल ।
समितिया कोषाध्यक्ष विदुर श्रेष्ठं लसकुस यानादीगु ज्याझ्वलय् भाषा प्रशिक्षक कृष्ण प्रजापति, नेपाः बहुउद्देश्यीय सहकारी संस्थाया नायः नारायणप्रसाद श्रेष्ठ, नेवाः मिसा दबू इटहरी उपमहानगरया अध्यक्ष अम्बिका श्रेष्ठ, संस्थाया सल्लाहकार देवनारायण श्रेष्ठ, नेवाः पुचः इटहरीया नायः विनोद चोच्छेँ, समितिया छ्यांजे वसन्तकुमार श्रेष्ठपिंसं नं थःथःगु नुगः खँ तयादीगु खः ।
न्हपांगु सत्र लिपा बन्द सत्रं चित्रमान प्रधान, गंगा श्रेष्ठ, मानकुमार श्रेष्ठ, रिता श्रेष्ठ व विदुर श्रेष्ठपिंत समितिया न्हूगु ज्यासना पुचःया निंतिं ल्यःगु खः ।
LEAVE YOUR COMMENTS