परोपकारया ७७ क्वःगु स्थापना दिवस
येँ(नेपालभाषा टाइम्स)- देय्या ज्याथःगु लोककल्याणकारी, सामाजिक संस्था परोपकारया ७७ क्वःगु स्थापना दिवस हंगु दु । भिंद्यः त्वालय् च्वंगु संस्थाया थःगु हे सभाकक्षय् छगू ज्याझ्वः यासें स्थापना दिवस हंगु खः । संस्थाया संस्थापकलिसें नेपाःया न्हापांम्ह हिदाता दयावीर सिंह कंसाकारया किपाय् स्वां देछासे न्ह्याःगु ज्याझ्वः संस्थाया नायः शिक्षाविद्लिसें नांजाःम्ह साहित्यकार हितकरवीर सिंह कंसाकारया सभापतित्वय् जूगु खः ।
नेपाल स्वयंसेवी रक्तदाता समाजया केन्दीय नायः प्रेमसागर कर्माचार्यं त्वाःदेवाय् मत च्याकाः उलेज्या यानादीगु ज्याझ्वलय् संस्थाया निम्हम्ह न्वकु गणेशप्रसाद बस्नेतं लसकुस यानादीगु खः ।
वरिष्ठ पत्रकार पुष्करभक्त माथेमां समाजसेवी दयावीर सिंह कंसाकार व समाजसेवाय् समर्पित परोपकार संस्थां स्वयमय् छगू उदाहरणीय जूगु धयादिल । ‘एनजीओ÷आइएनजीओत विदेशी ‘फन्ड’या निंतिं जक चायेकेगु प्रवृत्ति अप्वयाच्वंगु इलय् गुगुं नं वैदेशिक ग्वाहालि मकासे समाजसेवाय् समर्पित जुयाः संचालन जुयाच्वंगु परोपकार संस्था स्वयम हे छगू उदारणीय जू’, वय्कलं धयादिल ।
मूपाहां कर्माचार्यं परोपकार थेंज्याःगु सम्मानित सामाजिक संस्थालिसे हिदान थेंज्याःगु महान मानवीय सेवाय् सहकार्य यायेत तयार दु धासें न्हापांम्ह हिदाता कंसाकारं शुरु याःगु ज्यायात निरन्तरता बीगु निंतिं थःपिं न्ह्यचिलाच्वनागु दु धयादिल ।
संस्थाया नायः कंसाकारं दीन दुःखी, असहाय, ल्वगिया निःस्वार्थ सेवा यायेगु धइगु संस्थाया मूल भावनाकथं सामाजिक सेवायात निरन्तरता बीत कुतः यानाच्वनागु जानकारी बियादिल ।
संस्थाया मूछ्याञ्जे डा. डम्बरबहादुर नेपाली प्रगति प्रतिवेदन व दांभरिं उत्तमलाल नेपालीं र्आिर्थक ल्याःचाः प्रतिवेदन न्ह्यब्वयादीगु ज्याझ्वलय् थीथी वक्तापिंसं नं भिंतुना न्वचु बियादीगु खः । ज्याझ्वलय् परोपकार स्कुलपाखें ०३८ सालय् एसएलसी बियादीपिं विद्यार्थी पुचःपाखें ०७९या एसइइ परीक्षाय् उत्कृष्ट ल्याः हयाः उत्तीर्ण मिसा व मिजं ब्वँमियात सिरपाः नं लःल्हाःगु खः ।
LEAVE YOUR COMMENTS