एशियाया हे दकलय् तःधंगु लागू वासः गिरोहया नाइके ज्वन

एजेन्सी – द नेदरल्यान्डस्या प्रहरीं एशियाया हे दकलय् तःधंगु लागू वासः गिरोहया नाइके धकाःम्हसिका दुम्ह सो चि लपयात ज्वंगु दु। अष्ट्रेयाली प्रहरीं जारी यानातःगु इन्टरपोल सुचंया आधारय् वयात ज्वनागु खँ द नेदरल्यान्डस्या प्रहरीं धाःगु दु ।

सो चि लप नांया थ्व मनू चीनय् बूम्ह क्यानेडेली नागरिक खः । ‘द कम्पनि’ धाःगु थ्वयागु गिरोहं एशियाया ७० अर्ब डलरया लागू वासःया अवैध कोरोवारय् तःधंगु ब्वया कारोवार याना वयाच्वंगु दु। सो संसारन्यंकं दकलय् अप्वः मालाच्वंम्ह फरार अभियुक्त नं खः । नेदरल्यान्ड्सया एम्स्टर्डमय् च्वंगु स्किपोल विमानस्थलं ज्वंम्ह सोविरुद्ध थःगु देशय् मुद्दा न्ह्याकेत अष्ट्रेलियां सुपुर्दगीया कुतः यानाच्वंगु दु। अस्ट्रेलियाया संघीय प्रहरीया कथं अस्ट्रेलियाय् दुहां वइगु लागू वासः मध्ये ७० प्रतिशत सोया हे द कम्पनीपाखें दुहां वइगु खँ धाःगु दु ।

५६ दँया सोयात वयागु अवैध धन्दाया साम्रज्यया कारणं मेक्सिकोया लागू वासः कारोवाहरू एल च्यापो गुन्जमानलिसे तुलना यायेगु याः । छगू दशक न्ह्यवनिसें प्रहरीं माला वयाच्वंम्ह सोयात शुक्रवाः क्यानडापाखे वनेत्यंगु इलय् ज्वंगु खः । रोयटर्स समाचार एजेन्सीं संयुक्त राष्ट्र संघयात उद्धृत यानाः पितबिउगु छगू प्रतिवेदनय् सोया द कम्पनीं सन् २०१८ य् जक लागू वासः कारोवारपाखें १७ अर्ब डलरस्वयां अप्वः कमे याःगु खः । सोयात ज्वनेगु निंतिं अस्ट्रेलियाया संघीय प्रहरीया नेतृत्वय् नीगू निकायं ज्या याःगु खः । सोयात मालेगु व ज्वनेगु निंतिं न्ह्याकूगु अपरेशनयात ‘कुङ्गुर’ नां बियातःगु खः ।

ज्वने न्ह्यः तक सो मकाउ, हबकब व ताइवानय् सुलाच्वंगु अनुमान यानातःगु दु। वयात सन् १९९० य् लागू वासः ओसारपसारया द्वपनय् अमेरिकाय् ज्वनाः गुदँ जेलय् तयाहःगु खः ।