बेनीया बर्खेप्याखं क्वचाल
येँ(नेपालभाषा टाइम्स)- म्याग्दी जिल्लाया सदरमुकाम बेनीइ वंगु लछि न्ह्यःनिसें न्ह्यानाच्वंगु ‘बर्खेप्याखं’ क्वचाःगु दु । वंगु सोमवाः दकलय् लिपा असत्ययात सत्यं त्याकी धइगु सन्देशसहितया प्याखं क्यनाः लछि न्ह्यःनिसें न्ह्यानाच्वंगु प्याखं विधिवत रुपं क्वचायेकूगु खः ।
सोमवाः न्हिछियंकं बेनी बजारय् लाखे प्याखं व सनिलय् बेनीया हे संगमचोकय् लाखे व कृष्णया प्याखं क्यंगु खः । लाखेयात कृष्णं स्याःगु प्याखं क्यनाः क्वचायेकूगु खः । बेनीया सांस्कृतिक जात्राकथं कयातःगु प्याखंया लिपांगु दिं लाखे व कृष्णया युद्धया प्याखं क्यंगु खः ।
नेपालभाषा मंकाः खलः बेनीया न्वकु कविरकुमार श्रेष्ठं बेनीया नेवाः समुदायया परम्परागत व सांस्कृतिक म्हसीकाया रुपय् दुगु बर्खेप्याखं गथांमुगःनिसें चथाः छन्हु न्ह्यः तक थीथी प्याखं क्यनेगु याना वयाच्वंगु जानकारी बियादिल । थुगुसी बर्खेप्याखनय् लाखे, द्वँह, वा पीगु (रोपाइँ), नागनागिनी, जोगी प्याखं आदि क्यनेगु ज्या जूगु वय्कलं जानकारी बियादिल ।
मंकाः खलः बेनीया पुलांम्ह नायः राजेन्द्र श्रेष्ठं निसः दँ न्ह्यः बेनीइ वस्ती च्वंगु इलंनिसें दँय्दसं गथांमुगःनिसें चथाः छन्हु न्ह्यः करिब लछितक थीथी मौलिक प्याखं क्यनेगु याना वयाच्वंगु जानकारी बियादिल ।
मंकाः खलः बेनीया सांस्कृतिक विभागया कजि संजयकुमार श्रेष्ठं परम्पारगत रुपं क्यना वयाच्वंगु प्याखं तना वनीगु अवस्था वयेवं अज्याःगु प्याखंयात नं बर्खेप्यानय् निरन्तरता बियागु व प्याखंया निंतिं बेनीया सामुदायिक व निजी ब्वनेकुथिया ब्वँमि, कलाकारतय्त तालिम बियाः प्याखंयात निरन्तरता बियागु जानकारी बियादिल ।
मचांनिसें ज्याथःजिथितय्सं ब्वति काःगु बर्खेप्यानय् जक सछि स्वयां अप्वः कलाकार आवश्यक जूगु वय्कलं क्यनादिल । थुगुसीया प्याखंया निंतिं मंकाः खलः अन्तर्गतया ल्याय्म्ह पुचः व मय्जु पुचलं व्यवस्थापन याःगु खः ।
LEAVE YOUR COMMENTS