किपू नगर सांस्कृतिक संरक्षति क्षेत्र घोषणाया नितिं प्रस्तावित ऐन लःल्हात

किपू नगरपालिकां नीस्वंगु सांस्कृतिक संरक्षित क्षेत्र घोषणा तयारी कार्यदलपाखें जेठ ११ गते ११ बजे किपू नगरपालिकाया मेयर रमेश महर्जनयात प्रतिवेदन नापं प्रस्तावित ऐन लःल्हाःगु दु । सांस्कृतिक संरक्षित क्षेत्र कार्यदलया कजि श्रीकृष्ण महर्जनया नेतृत्वय् कार्यदलया न्याम्ह हे दुजःपिन्सं मंकाः कथं प्रतिवेदन नापं ऐन लःल्हाःगु खः ।

स्थानीय सरकार संचालन ऐन कथं स्थानीय सरकारं सांस्कृतिक संरक्षित क्षेत्र घोषणा यायेफइगु जूगुलिं उकिया नितिं तयारी यायेत न्याम्हेसिया कार्यदल दयेका निलाया दुने प्रतिवेदन तयार यायेत भाला बिउगु खः । निलाया दुने हे अध्ययन यानाः तयार याःगु उगु प्रतिवेदन व ऐन लःल्हाना कायेगु झ्वलय् किपू नगरपालिकाया मेयर रमेश महर्जनं आः वइगु नगर सभाय् उगु ऐनयात प्रस्तावया रुपय् यंकेगु बचं बियादीगु खः ।

कार्यदलया कजि कजि श्रीकृष्ण महर्जनं धयादी कथं किपू नगरया प्यंगू लागायात मूल रुपं नेवाः संस्कृति सम्पदा संरक्षण यायेमाःगु थाय् कथं नालाः प्राचीन किपू, पांगा, नगां नापं चोबहाः लागाय् ब्वथला थ्व प्यंगू हे लागां प्रतिनिधि जुइगु कथंया नगर स्तरया समिति दयेकेगु अले स्थानीय स्तर कथं प्यंगू लागाय् नं प्यंगू हे कथंया संरचना दयेका ज्या यायेगु नितिं संघीय संरचनाया मोडल कथं ऐनय् प्रस्ताव यानागु जानकारी बियादिल ।

वय्कलं नेपाःया संविधान, स्थानीय सरकार संचालन ऐन, अन्तर्राष्ट्रिय कानुन आइएलओ १६९, युएनड्रिप लगायतया आधार कयाः नेवाःतय्गु प्रथाजन्य संस्था गुथि नापं बाजं खलःया प्रतिनिधित्व जुइगु कथंया स्वायत्त कथंया निकाय दयेकेगु प्रस्ताव ऐनय् यानागु धयादिल । यदि थ्व ऐन पारित यानाः किपू नगरपालिकां लागू यात धाःसा किपुलिइ सांस्कृतिक पुनर्जागर वइगु, किपूया मौलिक संस्कृति संरक्षण जुइगु, प्रथाजन्य संस्था गुथिया महत्व अप्वइगु नापं किपूया पहिचानयात ल्यंकेगु ज्या जुइ धकाः धयादीगु दु । नगरपालिकां दयेकूगु उगु कार्यदलया दुजलय् रामभोला महर्जन, नरेश शाक्य, उज्जल महर्जन व सुवर्ण महर्जन च्वनादीगु खः ।

 

सम्बन्धित बुखँ

LEAVE YOUR COMMENTS