जयबागेश्वरीइ लुया वःगु किपा बचे यायेत माग

येँ -थनया पशुपति लागाय् च्वंगु ऐतिहासिक जय बागेश्वरी देगः थुनेगु झ्वलय् लुया वःगु आकर्षक अंगः किपा बचे यायेगुपाखे कुतः मजूगु खँय् स्थानीय वासिन्दां आक्रोश प्वंकूगु दु । जयबागेश्वरीया देगः थुनेगु झ्वलय् अन दुने मेगु देगः लुया वःगु खः । लिपा लुया वःगु देगः लिच्छविकालीन जुइमाः धइगु अनुमान दु । थ्वहे लिच्छविकालीन देगःया अंगलय् थ्व किपा च्वयातःगु लुया वःगु खः । दथुइ लाक्क कलात्मक सिँयागु झ्याः, झ्याःया दथुइ कलात्मक मूर्ति अले उकिया चाकःछिं थीथी रंगं थ्व किपा च्वयातःगु खः ।

किपा थीथी द्यःयागु खःसां खास छु खः धइगु धाःसा सी मदुनि । पशुपति विकास कोषं नं उकी छुं कथंया ध्यान मबिउगु खँ स्थानीय मनूतय्सं धाःगु दु ।
कोषपाखें फयांफछि देगः थुनाः न्हूगु दयेका छ्वयेगुपाखे जक ध्यान बियाच्वंगु द्वपं नं स्थानीयतय्सं बिउगु दु । स्थानीय अभियन्ता जलद वैद्यं झीथाय् न्हापा नं थीथी थासय् ल्वहंहिति, मूर्ति आदि लुया वइबलय् सरकारं उकियात हानं ल्हाका छ्वयेगु याइ, अले छुं दँलिपा अथे ल्हाकूगु गल्ती जुल धकाः न्ववायेगु याना हइ, थ्व नं अथे मजुइमा धकाः थःपिं हालाच्वनागु खँ कनादिल । आः पशुपति विकास कोषं पुरातत्व विभाग लगायत, विज्ञ पुचः व स्थानीय मनूतय्त तयाः सहलह यासें छु यायेगु धइगु खँ अनं हे निर्णय यायेमाःगु बिचाः नं वय्कलं तयादीगु दु ।

देगलय् अज्याःगु किपा लुया वयेवं म्हीग थीथी विज्ञ व पशुपति विकास कोषया पुलांपिं पदाधिकारीत वयाः उकिया अवलोकन याःगु खः । तर वय्कःपिंसं नं थथे हे याये माली धकाः छुं सुझाव धाःसा बियामदी ।

सम्बन्धित बुखँ

LEAVE YOUR COMMENTS