वा ग्वारा मैया म्युजिक भिडियो

येँ(नेपालभाषा टाइम्स)- टेलिभिजन ख्यलय् ख्यालि न्हिलि ज्याझ्वः न्ह्याकामि नापं नेपालभाषाया दबू ज्याझ्वःया लोकंह्वाःम्ह कलाकार सुरेन्द्र मानन्धरया नेपालभाषाया ‘वा ग्वारा मैं वा’ म्येँया म्युजिक भिडियो पिहां वःगु दु ।

वंगु सोमवाः पुलांम्ह राज्यमन्त्री रामवीर मानन्धरं म्युजिक भिडियो सार्वजनिक यानादीगु खः । उगु म्युजिक भिडियोयात कयाः मूपाहां मानन्धर, सिने पत्रकार विजयरत्न असंबरे, नांजाःम्ह म्येँ हालामि जुजुकाजी रंजित, संगीता शाक्य व संचारकःमि विराजकाजी राजोपाध्यायं नुगःखँ तयादीगु खः ।

म्युजिक भिडियोया म्येँय् सरस्वति मानन्धर, सुरेन्द्र मानन्धर, सुरेश मानन्धर व सबिना मानन्धरया सः दुथ्यानाच्वंगु दु । सुरेन्द्र मानन्धरं हे च्वयाः लसय् हनादीगु म्येँया म्युजिक भिडियोय् मानन्धरलिसें रेवन्तलाल श्रेष्ठ, रबिता बके श्रेष्ठ, मञ्जिला वज्राचार्यं अभिनय यानादीगु दु ।
अमन महर्जनं छायाँकन यानादीगु म्युजिक भिडियोया सम्पादन इन्द्र मानन्धरं यानादीगु खः ।