इतुम्बहाः म्युजियमया शनिवाः उलेज्या

येँ (नेपालभाषा टाइम्स)- थनया ऐतिहासिक इतुम्बहाः दुने चायेकेत्यंगु म्युजियमयात कयाः विरोधया सः थ्वयाच्वंसां थौं उकिया उलेज्या धाःसा याइगु जूगु दु । उगु म्युजियम दयेकेत अमेरिकाया न्यूयोर्कस्थित रुबिन म्युजियम अफ आर्टपाखें आर्थिक ग्वाहालि काल धकाः सम्पदा अभियन्तातय्सं उकिया विरोध यानाच्वंगु खः ।

रुबिन म्युजियम संसारया थीथी देशं खुया हःगु ऐतिहासिक ज्वलं न्यानाः थःथाय् सजे याइगु निकाय जूगु कारणं वयागु ध्यबा काये मजिउ धकाः थन विरोध जूगु खः । थ्व अभियानय् सक्रिय अधिवक्ता संजय अधिकारीं ‘नेपालभाषा टाइम्स’ यात कनादीकथं थ्व विरोध ज्याझ्वः इतुम्बहाः विरुद्ध मखु, अन अथें लानाच्वंगु ज्वलंत मुनाः छथाय् ब्वज्या यायेत्यंगु बांलाःगु ज्या खः, तर थ्व ज्याया लागिं रुबिन थेंज्याःगु बदनाम संस्थाया आर्थिक ग्वाहालि कायेत्यंगु जुयाः कन्हय् थुकिं बहाःयात हे बदनाम यानाबी सचेत यानाच्वंगु खः ।

मेखे इतुम्बहाः संरक्षण समितिया नायः प्रज्ञा शाक्यं थ्व ज्या न्ह्यानाच्वंगु ताःई दयेधुंकल, आः विरोध यानाच्वंपिं अभियन्तात सकस्यां अबलय् हे थुकिया निरीक्षण नं यानादीगु खः, अबलयय् छुं मधाः, आः वयाः विरोध याःगु अजूचायापु धयादिल । वय्कलं म्युजियम चायेकेगु लागिं फुक्क तयारी जुइधुंकूगु कारणं आः थुकिया उलेज्या सिधयेवं माःगु खँल्हाबल्हा यायेगु जुइ धयादिल ।

थ्व विवाद समाधान यायेत थःपि लगायत रुविन म्युजियमया प्रतिनिधि व सम्पदा अभियन्ता समेत स्वंगुलिं पक्ष च्वनाः वार्ता यायेत थःपिं तयार दुगु खँ नं कनादिल ।

थौं सुथय् जुइगु उलेज्याझ्वलय् ब्वनातःपिं आपालं पाहांपिं उपस्थित जुइ फइ मखु धकाः सुचं बियाहःगु दु । तर विहार सर्वसंघया दुजः लिसें मेमेगु विहारया दुजःपिं धाःसा वयेत्यंगु खँ नं वय्कलं कनादिल । थ्व ज्यां विहारया दुजःत लय्ताःगु खँ नं वय्कलं कनादिल ।

सम्बन्धित बुखँ

LEAVE YOUR COMMENTS