गाडी कुतुं वनाः २० म्ह सित, सीपिं मध्ये छम्ह मध्ये १९ म्ह तामांग जातियापिं

येँ – दुप्चेश्वर गाउँपालिका–१ घ्याङडाँडाय् शुक्रवाः बहनी जूगु मिनीट्रक दुर्घटनाय् सीपिं नीम्हेसिया सनाखत जूगु दु । दुर्घटनाय् लानाः घाःपाः जूपिं झिंन्याम्हेसिया येँय्वासः यायेगु ज्या जुयाच्वंगु दु । दुप्चेश्वर गाउँपालिका–६ सिम्टाङ पाखें घ्याङफेदीया सिसिपु वनाच्वंगु बा. ३ ख ३९१३ नम्बरया मिनीट्रक शुक्रवाः घ्याङडाँडाय् दुर्घटना जूगु खः ।

दुर्घटना जुयाः घटनास्थलय् हे झिंच्याम्ह सीगु खःसा छम्ह वासः यायेत यंकेगु झ्वलय् लँय् तुं मदुगु खः । अथेहे छम्ह वासः यानाच्वंगु इलय् मदुगु खँ जिल्ला प्रहरी कार्यालय नुवाकोटं धाःगु दु । सीपिं सकसियां सनाखत जूगु खः । उकी सीपिं २० म्ह मध्ये छम्ह बाहेक मेपिं फुक्क हे स्थानीय तामाङ जातियापिं लाःगु दु ।

प्रहरी कार्यालयपाखें प्राप्त जानकारी कथं सीपिं यात्रुत घ्याङफेदी सिसिपुया २७ दँ दुम्ह विभिमाया तामाङ, १४ दँ दुम्ह सीता तामाङ, ३६ दँ दुम्ह सुनश्री तामाङ, २४ दँ दुम्ह शुकराम तामाङ, ३९ दँया सोनम लामा, ५५ दँया टोकले तामाङ, २२ दँया मंगले तामाङ, ४४ दँया आइत तामाङ, ४० दँया सेल्वोन तामाङ, ६० दँया खाम्सुङ तामाङ, ३२ दँया रिवल तामाङ, २० दँया भीमबहादुर तामाङ, ४३ दँया मिङमार तामाङ, ३७ दँया छोवाङ सोनाम तामाङ, ३४ दँया लक्ष्मण तामाङ, ४६ दँया वीरबहादुर तामाङ, २० दँया कृष्ण तामाङ, ५० दँया मीनबहादुर तामाङ, ४७ दँया सुने लामा व शिरबेसीया १५ दँया रितेश पण्डित खः ।

मिनीट्रक दुर्घटनाय् लानाः वासः याकाच्वंपिं घ्याङफेदी सिसिपुया हे २२ दँया छिरिङ तामाङ, ४० दँया रामबहादुर तामाङ, १७ दँया रामु तामाङ, २६ दँया साहिला तामाङ, २३ दँया शिरमेन्दो तामाङ, सावित्री तामाङ, ३८ दँया मुइजित तामाङ, ४९ दँया बीरबहादुर तामाङ, ३८ दँया लक्ष्मण तामाङ, ३३ दँया चन्द्रबहादुर तामाङ, २६ दँया शुकराम तामाङ, रामभक्त थापा, मानबहादुर तामाङ व गुला दुम्ह मिसा मचापिं खः ।

मिनीट्रक सतक स्वयां थ्यंमथ्यं ५०० मिटर क्वय् तादी खुसिइ कुतुंवंगु खँ प्रहरीं धाःगु दु । थःथितिपिं सीथाय् घेवा ज्याझ्वलय् ब्वति कायेत मिनीट्रकय् च्वना वंपिं दुर्घटनाय् लाःगु खः ।

सीथाय् वना वःपिं हे सित
उगु गाडी दुर्घटनाय् लाःपिं सकलें थःथिति सीथाय् जूगु धार्मिक संस्कार घेवा यायेथाय् वनेत्यंपिं खः । थःथिति सीथाय् वनाच्वंपिं यात्रुत हे गाडी दुर्घटनाय् लानाः सीगु खः । उपिं च्वना वःगु उगु मिनी ट्रक सतक स्वयां अथे हे ५०० मिटर क्वय् कुतुं वंगु खः । गाडी दुर्घटनाया कारण सी मदुनि ।

अथे खःसां प्रहरीं अनुमान याः कथं गाडीइ माक्व स्वयां यक्व यात्रु तया हःगुलिं कुतुं वंगु खनेदु । मिनिट्रकय् ४५ म्ह स्वयां अप्वः यात्रु च्वना वःगु खँ प्रहरीं धाःगु दु । यक्व मनू तया हःगुलिं उगु ट्रक अनियन्त्रित जुयाः कुतुं वंगु खँ धाःगु दु । अथे खःसां दुर्घटनाया कारण पत्ता लगे यायेत प्रहरीं कुतः यानाच्वंगु दु ।

सम्बन्धित बुखँ

LEAVE YOUR COMMENTS