नेपाः वयेत्यंगु मेगु लट ‘लुँ’ लँय् हे बेपत्ता
येँ (नेपालभाषा टाइम्स)÷राजश्व अनुसन्धान विभागया कमजोरीं यानाः हङकङं नेपाः वयेत्यंगु रेडी ट्रेडर्सया मेगु छगू सिपमेन्ट लँ दथुइ हे बेपत्ता जूगु दु । वंगु साउन २ गते त्रिभुवन अन्तर्राष्ट्रिय विमानस्थलय् १०० किलो लुँ नं रेडी ट्रेडर्सया नामं हे नेपाः वःगु खः ।
उगु लुँ ज्वनेवं राजश्व अनुसन्धान विभागपाखें तस्करी जूगु यक्व हे लुँ ज्वंगु सुचं पिहां वःगु खः । थुगु सुचं पिहां वयेवं हङकङं नेपाः वयेत्यंगु रेडी ट्रेडर्सया निगूगु लटया सामान उखें तुं गायब जूगु खः । नेपालय् लुँ ज्वंगु सुचं पिहां मवःगु खःसा निगूगु लटया सामान नं नेपाः वइगु व उमित ज्वने फइगु खँ भन्सार विभागं धाःगु दु ।
थ्व रेडी ट्रेडर्सं वंगु निलाया दुने थ्यंमथ्यं २ हजार किलो सामान आयात यायेधुंकूगु दु । दोलखाया दिलीप भुजेलया नामं चायेकातःगु थ्व कम्पनीया वास्तविक मालिक धाःसा लुइके मफुनि । भुजेल न्हापा सामान्य ज्यामि ज्या याइम्ह खःसा ज्यामि ज्या यानाः ध्यबा कमे मजुल धकाः लिपा चाउमिन कम्पनीइ ज्या याः वंम्ह खः । भुजेलयात वया पाजुं हे कम्पनी दर्ता यात धाःसा २० हजार तका वइ धासें कम्पनी दर्ता याके बिउगु खँ पिहां वःगु दु ।
थ्वहे झ्वलय् १०० किलो ज्वंगु प्रकरणय् त्रिभुवन विमानस्थल भन्सार कार्यालयया स्वम्ह कर्मचारी व स्वम्ह भन्सार एजेन्टयात राजश्व अनुसन्धान विभागं ज्वंगु दु । थ्व नापं यानाः १०० किलो लँु तस्करी प्रकरणय् ज्वंपिनि ल्याः झिंखुम्ह थ्यंगु दु ।
म्हिगः भन्सार अधिकृत सन्तोष चन्द, खरिदार लिसें जाँचकी कुमार ढकाल व एक्सरे अपरेटर सरोज श्रेष्ठयात ज्वंगु खः । उकथं हे लुँ भन्सार पास यायेगु ज्याय् दुथ्याःगु द्वपनय् भन्सार एजेन्ट यादवशंकर पराजुली, सुदर्शन गौतम व रुकमिना सुब्बायात ज्वंगु खः ।
LEAVE YOUR COMMENTS