मध्यपुर थिमि नगरपालिकां न्हि ६ हजारयात निःशुल्क खाना

थिमि – मध्यपुर थिमि नगरपालिकां न्हि करिव ६ हजार मनूतय्त निःशुल्क खाना नकेगु व्यवस्था यानाच्वंगु दु ।

थिमि नगरपालिकां बहाखा बजाःस्थित एभरेस्ट पार्टी प्यालेस, सिद्धिकाली चोकया शुभश्री व बोडेया सिन्टिटारय् नियमित रूपं नकेगु व्यवस्था यानाच्वंगु खः । लकडाउनया कारणं न्हिया न्हिथं मजदुरी यानाः नयेमाःपिनि आम्दानीया स्रोत मदुगु कारणं निःशुल्क नकेगु ज्या यानाच्वंगु खँ अनया जनप्रतिनिधि हरिदास प्रजापतिं धयादिल । खाना नकेगु थासय् सामाजिक दुरी कायम यानाः लाइनय् तयाः खाना वितरण जुयाच्वंगु दु ।

अन सुथय् व बहनी यानाः निक्वः व्यवस्थित रुपय् प्याकेट दयेकाः नयेगु वितरण यानाच्वंगु दु । नगरपालिकाया अभियान कथं न्ह्याःगु थुगु ज्याय् थीथी दातातय् ग्वाहिलिइ संचालन जुयाच्वंगु खः । न्हिया न्हिथं खाना नकेगु निंतिं ६०म्ह स्वंमसेवीत नियमित रूपं खटे जुयाच्वंगु दु ।