कार्यविनायकय् अनावश्यक त्रिशुल

यल (नेपालभाषा टाइम्स)- थनया नांजाःगु कार्यविनायकय् गनं छुं अनुमति तकं मकासे भराय्जाःगु त्रिशुल तयेत्यंपिं बाबाजीतय्त स्थानीय वडा कार्यालयं पना बिउगु दु । थ्व अपरिचित बाबाजी–तय्सं कार्यविनायक द्यःयाथाय् करिब २० फिट तजाःगु त्रिशुल हयाः धस्वाकेत्यंगु खः । त्रिशुल तयेत उमिसं उकी पुजाआजा नापं यानाः हया तयेधुंकूगु खः ।

थ्व खँ सीवं यल मनपा वडा २२ या वडा अध्यक्ष सागर तुलाधर व मेपिं वनाः बाबाजीतय्त पंगु खः । कार्यविनायक बिस्कं म्हसीका दुगु धार्मिकस्थल जूगु कारणं अन पुरातत्व विभाग व स्थानीय जनताया राय मकासे छुं नं वस्तु तयेगु व दयेकेगु ज्या जुइ मखु धासें वडा अध्यक्ष तुलाधरं पनादीगु खः । स्थानीय मनूतय्सं नं अन थुकथं द्यःयात मल्वःगु ज्याखँ याये मजिउ धकाः सुझाव बियाच्वंगु दु ।