निगु देय्या जनतां लाभ कायेफइ

भारतीय प्रम मोदी हाकनं नेपाः भ्रमणया इच्छा

येँ – चिनिया विदेशमन्त्री नेपाःया भ्रमणय् वयाच्वंगु इलय् हे नेपाः व भारत दथुइया पेट्रोलियम पदार्थ पाइपलाइनपाखें हयेगु ज्याया नं उलेज्या जूगु दु । पाइपलाइनया उलेज्या यायेगु झ्वलय् भारतीय प्रधानमन्त्री नरेन्द्र मोदीं भिडियो कन्फरेन्सपाखे संबोधन यानादीगु खःसा वय्कलं थःगु ट्वीटरपाखें नं छुं छुं खँ धयादीगु दु ।

ट्वीटरय् मोदीं मोतिहारी–अमलेखगंज पाइप लाइनया मंकाः उलेज्या यायेखंगुलिं थः लय्ताःगु खँ धासें निगू पक्षया हितय् जुइगु ज्यायात निरन्तरता बीगु खँ धयादीगु दु । प्रधानमन्त्री मोदी भारतया ग्वाहालिं नेपाःया फुक्कं क्षेत्रय् प्रगति जुयाच्वंगु धासें नेपाःया विकासया निंतिं मंकाः कुतःयात अझ व्यापकता बीगु खँयात कयाः नं ट्वीट यानादीगु दु ।

नेपालय् तःभुखाय् लिपा पुनर्निर्माणय् गोरखा व नुवाकोटय् यानागु ग्वाहालिया कारणं छेँ दनेगु ज्या न्ह्याःगु धासें उकिया लिच्वःकथं मनूत हाकनं छेँय् च्वनेखंगु खँ नं ट्वीट यानातःगु दु । प्रधानमन्त्री मोदीं नेपाः व भारत दथुइ उच्चस्तरीय राजनीतिक वार्तां निगुलिं देय् नियमित सम्पर्कय् दुगु न्हापा स्वयां सम्बन्धय् बांलाक सुधार वःगु धासें थः व नेपाःया प्रम ओलीया दथुइ प्यक्वः तक नापलायेगु ज्या जूगु खँ नं न्ह्यथनातःगु दु ।

प्रम मोदीं विकासया निंतिं हे निगू देय्या दथुइ साझेदारी यायेगु व अवसरयात सदुपयोगु यायेफूगु खः धासें मंकाः कुतलं निगुलिं देय्या जनतां लाभ कायेफइगु खँ नं ट्वीट यानादीगु दु । वंगु न्यादँया दुने महत्वपूर्ण निगू पक्षीय परियोजना क्वचाये फूगु दु धासें थःगु नेपाल भ्रमणया झ्वलय् पशुपति धर्मशाला व वीरगंजय् आइसिपिया उलेज्या यानागु खँ नं ल्ह्वनादीगु दु ।

नेपाःया विकासय् भारतया साझेदारी व सक्रियता अप्वयेकेत न्हूगु क्षेत्रय् ग्वाहालि यायेत थम्हं कुतः यानागु व उकिया लबः निगुलिं देय्या जनतां कायेफयेमाः धकाः नं ट्वीट यानादीगु दु । भारतीय प्रधानमन्त्री मोदीं भिडियो कन्फरेन्सपाखें नेपाःया प्रम ओलीया स्वास्थ्य लाभया कामना यासें थःत नेपाः भ्रमणया निंतिं ब्वंगुलिं थम्हं हाकनं नेपाः भ्रमण यायेगु खँ नं ट्वीटय् धयातःगु दु ।

मोदीं नेपाःया प्रमया इनापयात स्वीकार यासें ट्वीटय् धयातःगु दु, ‘छिं बियादीगु भ्रमणया ब्वना जिगु निंतिं तसकं महत्वपूर्ण जू, नेपाः वयेगु जिगु न्ह्याब्लेंया इच्छा खः, जि ई मिले यानाः पक्का हे वयेगु जुइ ।’