देय् दबू २४ वडाया चियापान ज्याझ्वः

येँ (नेपालभाषा टाइम्स)÷ नेवाः देय् दबू येँ महानगर समिति २४ वडा कचाया ग्वसालय् वंगु सोमवाः भिंतुना कालबिल लिसें चियापान ज्याझ्वः जुल । देय् दबू २४ वडा कचाया ग्वसालय् गणतन्त्र दिवसया लसताय् उगु ज्याझ्वः जूगु खः ।

देय् दबू येँ महानगर समितिया नायः शोभा महर्जन वज्राचार्यया सभाध्यक्षताय् जूगु ज्याझ्वलय् विशिष्ट पाहांकथं बागमति प्रदेश सांसद शैलेन्द्रकमान वज्राचार्य, नेवाः देय् दबूया केन्द्रीय नायः पवित्र वज्राचार्य, न्वकु उमेश स्थापित, २४ वडा कचाया सल्लाहकार भगवान शाक्य झायादीगु खः ।

महानगर समितिया नायः महर्जनं लसकुस यानादीगु ज्याझ्वलय् पाहांकथं झायादीपिंसं थःथःगु नुगःखँ तयादीगु खः । ज्याझ्वलय् पुलांम्ह मन्त्री जीवनराम श्रेष्ठ, भाषा ख्यःलिसें स्थानीयवासीया उपस्थिति दुगु खः ।