येँ महानगरपालिकां बजेट म्हो मयाइगु

येँ (नेपालभाषा टाइम्स)-येँ महानगरपालिका आर्थिक दँ २०८०÷८१ या बजेट न्हापा स्वयां म्हो मयायेगु तयारीइ दु । संघीय सरकारं प्रदेश व पालिकातय्त बीगु बजेट अनुदान कटौती याइगु जूसां कामपां धाःसा न्हापा थें हे बजेट हयेगु तयारी याःगु खः । येँ महानगरपालिकां चालु आर्थिक दँया निंतिं २५ अर्बया बजेट हःगु खः । थुगुसी नं थ्व हे हाराहरीइ बजेट वइगु खँ धाःगु दु ।

येँमनपाया राजस्व विभागया प्रमुख धु्रव काफ्लें रासस लिसे खँ ल्हासें संघीय सरकारं अनुदान कटौती याःसां येँ महानगरपालिकाया थःगु हे स्रोत बल्लाःगुलिं बजेटय् यक्व हिउपाः वइमखु धाःगु दु । राजस्व प्रमुख काफ्लें धाःगु दु, ‘येँ महानगरपालिकां चालु आर्थिक दँया निंतिं थ्यंमथ्यं २५ अर्बया बजेट हःगु खः । वइगु आर्थिक दँय् छुं न्हूगु योजना हयेगु तयारी दु, अथेखःसां यक्व धयाथें पुलांगु हे योजनां निरन्तरता काइगु जुइ ।’

येँ महानगरपालिकां वइगु आर्थिक दँया बजेट व नीति तथा कार्यक्रमया निंतिं त्वाःत्वालय् भेला तयाः व अनलाइन पाखें नं सुझाव मुनाच्वंगु दु । महानगरं दयेकीगु योजनाया २३ गू शीर्षकय् सुझाव बीफइगु खँ धाःगु दु । येँ महानगरपालिकाया विकास, सुविधा वितरण, सेवा प्रवाह व समृद्धिया निंतिं छु छु क्षेत्रय् गज्याःगज्याःगु नीति दयेकेमाली, गज्याःगु कार्यक्रम हयेमाली थें ज्याःगु न्ह्यसः तयाः येँ मनपां सुझाव संकलन यानाच्वंगु खः ।