खस आर्ययात आरक्षणं चीकेगु ईयु सुझाव विवाद ,ईयुयात जनजातिया समर्थन

येँ – आदिवासी जनजाति महासंघं युरोपियन युनियनया निर्वाचन पर्यवेक्षण प्रतिवेदनयात समर्थन याःगु दु । लिसें महासंघं ईयुया उगु सिफारिसया आलोचना यासें परराष्ट्र मन्त्रालयं विज्ञप्ति पिथंगु खँय् आपत्ति नं प्वंकूगु दु । जनजाति महासंघया अध्यक्ष जगतबहादुर बरामं म्हिगः छगू विज्ञप्ति जारी यासें खस आर्यया आरक्षण खारेज यायेमाःगु खँ धयादीगु दु । ईयुया प्रतिवेदनय् वर्तमान राजनीतक अवस्था व समावेशीकरणयात पाय्छि रुपं न्ह्यथंगु दु धासें महासंघं ‘प्रतिवेदनया सुन्दर पक्षया अवमूल्यन यायेत परराष्ट्र मन्त्रालयं गोलमटोल ढंगं उत्तेजनाय् वयाः प्रतिवेदन गलत जुल धकाः टिप्पणी यायेगु ज्या दुःखद्’ जूगु खँ धाःगु दु ।

प्रेस विज्ञप्तिइ सलंसः दँनिसें वहिष्करणय् लाःपिं आदिवासी जनजाति, दलित, मिसा, यौनिक अल्पसख्यंक, मुस्लिम, आदिया प्रतिनिधित्व सुनिश्चित, समानता व विश्वव्यापी मान्यता कथं जुइमाःगु खःसां प्रतिनिधिसभा व प्रदेशसभा निर्वाचनय् उकथं मजूगुलिं ईयुया प्रतिवेदनयात महासंघं सही ठहर यानागु खँ न्ह्यथनातःगु दु । सदियौं निसें शासन याना वयाच्वंगु खसआर्य शासकतय्त हे प्रतिनिधिसभा व प्रदेशसभाय् आरक्षणया व्यवस्था यानाः समावेशी लोकतन्त्रया खिल्ली उडे याःगु दु धासें छगू जातिया वर्चश्व कायम जुइकथं राज्य सरकारं यानाच्वंगु ज्यायात कयाः महासंघं घोर आपत्ति नं प्वंकूगु दु ।

निर्वाचन प्रणालीइ खस आर्य समुदाययात नं आरक्षणय् तयातःगु चीकेमाः धकाः ईयुं उगु प्रतिवेदन बीवं डा. बाबुराम भट्टराई, योगेश भट्टराई, कमल थापा थेंज्याःपिं खस आर्य समुदायया नेतातय्सं विरोध याःगु खःसा म्हीग परराष्ट्र मन्त्रालयं नं कडा विज्ञप्ति जारी यासें ईयुया विरोध याःगु खः । मन्त्रालयं ईयुया थ्व प्रतिवेदनयात ईयु हेडक्वार्टरय् समेत यंकेगु ख्याच्वः बिउगु दु ।

प्रेस काउन्सिलपाखें ईयुया विरोध
ईयुया निर्वाचन प्रतिवेदनं नेपाःया मिडिया सम्बन्धी ज्या याइगु नियामक संस्था प्रेस काउन्सिलय् नं अध्यक्षयात चीकाः उपाध्यक्षपाखें ज्या याकाच्वंगुलिं क्वातुक ज्या याये मफुत धकाः च्वयातःगु खँय् प्रेस काउन्सिल नेपालं आपत्ति प्वंकूगु दु । काउन्सिलपाखें कार्यवाहक अध्यक्ष किशोर श्रेष्ठं म्हिगः छगू वक्तव्य जारी यासें ईयुं प्रेस काउन्सिलय् तकं हस्तक्षेप यात धयादीगु दु । वक्तव्यय् प्रेस काउन्सिल बारे ईयुया टिप्पणी अतिकं सतही जूगु खँ नं धयातःगु दु । ईयुया प्रतिवेदनय् काउन्सिलय् माओवादीपाखें वःम्ह अध्यक्ष भवानी बरालयात चीकाः एमालेपाखें वःम्ह किशोर श्रेष्ठयात कार्यवाह दयेकातःगु खँ फुटनोटय् उल्लेख यानातःगु खः ।