आमहडताल यायेगु दाहालया ख्याच्वः

येँ (नेपालभाषा टाइम्स) – नेकपाया अध्यक्ष पुष्पकमल दाहालं माघ १६ गते लिपा सरकार विरुद्ध आम हड्ताल यायेमालीगु ख्याच्वः बिउगु दु। म्हिगः अखिल नेपाल महिला संघया भेलायात सम्बोधन यासें वय्कलं उगु ख्याच्वः बियादीगु खः ।

दाहालं प्रधानमन्त्री ओलीं संसद जक विघटन याःगु मखुसें संविधान व संघीय लोकतान्त्रिक गणतन्त्रयात हे विघटन याःगु द्वपं नं बियादिल । वयकलं धयादिल, ‘प्रधानमन्त्री ओलीं संसद विघटन याःगु मखु, थ्व अधिकार वय्कःयाके मदु, ओलीया गलत पलाःया विरुद्ध आन्दोलनया विकल्प नं मदु, आन्दोलन यायेगु लिबाके मजिउ, जनता हे दकलय् च्वय् खः ।’

सम्बोधनया झ्वलय् वय्कलं आः न्ह्याइगु आन्दोलनयात कयाः तयारी अवस्थाय् च्वनेत नं कार्यकर्तातय्त निर्देशन बियादिल । वय्कलं धयादिल, ‘संघीय लोकतान्त्रिक गणतन्त्र बुलुहुँ ब्वलनाच्वंम्ह मचा खः । वयात म्वाकेगु निंतिं जनअदातलं फैसला न्यंकेमाःगु आवश्यकता दु ।’

प्रम ओलीया सोच न्हापांनिसें प्रतिगमनकारी जूगु धासें आः वयाः उकिया पुष्टि जूगु खँ नं धयादीगु दु । सम्बोधनया झ्वलय् दाहालं पार्टीया विधिविधान माने मयाइम्ह, समावेशी समानुपातिक मयःम्ह ओलीं अन्ततः संविधान हे विघटन याना बिउगु खँ धासें धयादी, ‘जनताया बुहदलीय जनवाद त्वःतूम्ह न्हापांम्ह मनू नं ओली हे खः ।’

दाहालं प्रम ओली लिसे सहकार्य यायेगु झ्वलय् थम्हं नं छुं कमजोरी जूगु खँ स्वीकार यासें उकियात थःगु गल्ती जूगु खँ नं धयादीगु दु। अध्यक्ष दाहालं अदालत व निर्वाचन आयोग प्रति थःगु पूर्ण विश्वास दु धासें सुद्र्यः चिं व नेकपाया आधिकारिकता थःपिंत हे वइगु दावी नं यानादिल ।

सम्बन्धित बुखँ

LEAVE YOUR COMMENTS