यःसिं पालाः साला हयेगु शुरु

येँ – यँयाः जात्रा न्ह्याकेत धस्वाके माःगु यःसिंया लागिं सिमा पालाः येँपाखे हयेगु शुरु जूगु दु । नालाया यःसिंगुँनिसें म्हिगः साला हःगु यःसिं ख्वपया गट्ठाघरय् थ्यंकाः दिकूगु दुसा थौं हानं सालाः येँया भोताहिति पिने थ्यंकीगु ग्वसाः दु । यःसिं कायेगु लागिं म्हीग केन्द्रीय मानन्धर संघया दुजःत येँनं साइत यानाः पिहां वंगु दु ।

वय्कःपिं म्हीग हनुमानध्वाखा दुनेया नासः चुकय् सिन्हः तिनाः सुथसिया ११.०५ बजेया साइतय् वन प्रस्थान जूगु खः । उगु इलय् वय्कःपिं लिसें गुर्जुया पल्टन नं नापं वंगु खः । नालाया यःसिंगुँइ बहनीसिया ८.०५ बजेया साइतय् सिमा पालेगु ज्या जूगु खः ।

पाले न्ह्यः सिमाय् छम्ह दुगु बलि बियाः पुजा याःगु खःसा सिमा पालेगु पा (बञ्चरो) नं पुजा याःगु खः । केन्द्रीय मानन्धर संघपाखें छुं न्हि न्ह्यः हे यःसिंगुँ वनाः गुँपुजा यासें यःसिं थनेत माःगु सिमाय् चिं तयाथकूगु खः । हनुमानध्वाखाय् यःसिं थनेवं यँयाः जात्रा शुरु जूगु भाःपी ।

सम्बन्धित बुखँ

LEAVE YOUR COMMENTS