‘विमान अपहरणया पूर्व जानकारी दुगु खः’

येँ – येँनं इण्डियन एयरलायन्सया छगः विमान अपहरण यानाः छवाः जक यात्रुतय्त बन्दी दयेकातःगु नं म्हिगः २० दँ क्यन । अपहरण २० दँय् क्यंगु सन्दर्भ लाकाः नेपाःया अन्तर्राष्ट्रिय विमानस्थलया सुरक्षा व्यवस्था गुलि क्वातुकल धइगु बारे थन सहलह शुरु जूगु दु । थ्वहे झ्वलय् उगु विमान अपहरण जुइ स्वयां छुं न्हि न्ह्यः जक नेपाःपाखें विमान अपहरण जुइफु धइगु बारे नेपाःयात सुचं वःगु खँ धाःगु दु । तर नेपालं धाःसा उगु सुचंयात गम्भीर रुपं मकाःगु जुयाः विमान अपहरण जूगु खँ धया हःगु दु ।

अबले विमान अपहरण जूगु बारे छानबिन यायेगु लागिं नेपाः सरकारं छगू छानबिन पुचः नं गठन याःगु खः । उगु हे छानबिन पुचःया छम्ह दुजः लिसें पुलांम्ह सचिव खेमराज रेग्मीं नेपाःपाखें अपहरण जुइफु धकाः छुं न्हि न्ह्यः हे जानकारी वःगु खःसां तत्कालीन नागरिक उड्डयन मन्त्रीं समेत उकियात हल्का रुपं काःगु खँ कनादीगु दु । बीबीसी नेपाली सेवालिसे खँ ल्हासें रेग्मीं विमान अपहरण जुइफु धइगु पूर्व जानकारी हे वःगु खःसां नेपालं गम्भीर रुपं मकाःगु जुयाः उगु घटना जूगु खुलासा यानादीगु खः ।

विमान अपहरण जुइफु धइगु उगु जानकारी गनं वःगु धइगु खँय् वय्कलं धयादीगु दु, ‘जानकारी पिने देशं वःगु खः । आखिर सही हे जुयाच्वन ।’ नेपालं अपहरण याना यंकूगु उगु भारतीय विमानयात अपहरणकारीतय्सं अफगानिस्तानया कान्धारय् यंकूगु खः । उगु विमान व उकी च्वना वःपिं यात्रुतय्त बचे यायेगु लागिं अबले भारतं थःगु जेलय् कुनातःपिं स्वम्ह आतंकवावादीतय्त मुक्त याये माःगु खः । थ्वहे घटना लिपांनिसें हे नेपाः व भारतया स्वापू समेत ख्याउँया वंगु खः ।