गुम्बा, विहार पुनःनिर्माण अलपत्रय्

येँ -राष्ट्रिय पुनःनिर्माण प्राधिकरणपाखें कार्यविधि मस्यौदा पारित मजूगुलिं यानाः तःभुखाचं क्षति जूगु आपालं गुम्बा व विहार निर्माण यायेगु ज्या अलपत्रय् लानाच्वंगु दु । भुखाय् ब्वःगु स्वदँ फुइ धुंकाः नं आतकं कार्यविधि पारित याये मफयाः क्षतिग्रस्त गुम्बा–विहार पुनःनिर्माण यायेगु ज्या न्ह्याये मफयाच्वंगु खः ।

करिब लछि न्ह्यः प्राधिकरणया कार्यकारी समितिया बैठकं कार्यविधि मस्यौदा यानाः निर्देशक समितिया बैठकय् पेश याःगु खः । मस्यौदा बैठकय् पेश याःसां पारित धाःसा मजुल । कार्यविधि पारित मजूगुलिं हे तःभुखाचं क्षति जूगु देय्न्यंकंया ८९५ गू विहार व गुम्बा अलपत्र अवस्थाय् लानाच्वंगु दु ।

थगुने संघीय मामिला तथा स्थानीय विकास मन्त्रालय अन्तर्गतया केन्द्रीय आयोजना कार्यान्वयन इकाइं देय्न्यंकंया झिंस्वसः व नीगु गुम्बा विहारया सर्वेक्षण याःगु खः । उगु सर्वेक्षणं ८९५ गू विहार, गुम्बा पुनःनिर्माण यायेमाःगु प्रतिवेदन सार्वजनिक नं जूगु खः । सर्वेक्षण प्रतिवेदनकथं ३३१ गू गुम्बा, विहार सामान्य मर्मत सम्भार यानाः हाकनं संचालन याये फइगु अवस्था दुसा ल्यं दुगु गुम्बा, विहार बांलाःगु अवस्थाय् दुगु प्राधिकरणं जानकारी बिउगु दु ।

तःभुखाचं क्षति जूगु गुम्बा, विहार पुनःनिर्माणया निंतिं चालु आर्थिक दँय् निगू अर्ब नीन्यागू करोड दां विनियोजन याःगु दु । बजेट विनियोजन जूसां कार्यविधि पारित मजूगुलिं गुकथं पुनःनिर्माणया ज्या न्ह्याकेगु धइगु खँय् अलमल जुयाच्वंगु खः । उखे नेपाल गुम्बा–विहार महासंघं पुनःनिर्माणय् ढिलासुस्ती जुयाच्वंगु धासें याकनं पुनःनिर्माण न्ह्याकेत दबावमूलक ज्याझ्वःतकं संचालन याःगु खः ।