दुर्गम गांया मानन्धरतय् विजोग अवस्था !

येँ – रामेछाप जिल्लाय् छगू अज्याःगु दुर्गम गाउँपालिका लूगु दु गनया अधिकांश जनता मानन्धर जातियापिं खः, अले थ्व मानन्धर जातिया मनूतय् रोजगारीया मूख्य ज्या धइगु अप्पा भट्टाय् वनाः अप्पा छीगु खः । थुमिसं अप्पा भट्टाय् वनाः थःपिंसं जक अप्पा छीगु मखु, थः चिचीधिकःपिं मस्तय्त नापं अप्पा छीगु ज्या याकेत ब्वना यंकीगु जूगुलिं उमि मस्त आखः ब्वनेगु ज्यां तकं बञ्चित जुइ मालाच्वंगु दु ।

रामेछापया दुर्गम खनियापानी गामय् च्वंपिं गरिब मस्तय्त आखः ब्वंकेगु योजना ज्वनाः उखे झाःम्ह कन्सर्न नेपाल नापं नेपाः राष्ट्रिय पार्टीया नायः डा. विजय सैंजुं थ्व खँ कनादीगु खः । मस्तय्त स्कूलय् भर्ना याकेगु अभियानया झ्वलय् डा. सैंजु लगायत वय्कःया पुचः स्थानीय पंचकन्या प्राविइ वंबलय् अन स्थानीय मानन्धरतय् आपालं मस्त स्कूल भर्ना जुयाः नं ब्वं धाःसा मवःगु पत्ता जूगु खः ।

छाय् आखः ब्वं मवल धकाः न्यनेकने याःबलय् मस्त फुकसित उमि मांबौपिंसं ख्वपया थीथी अप्पा भट्टाय् हयाः ज्या याकातःगु लुइकूगु खः । डा. सैंजुं कनादी कथं उगु गामय् करिब ११० गू ति मानन्धर परिवार दु । उकी मध्ये २५० म्ह मस्त दु गुमित स्पोन्सर यानाः आखः ब्वंके माःगु अवस्था दु ।

तसकं गरिब अवस्थाय् लानाच्वंपिं थ्व मस्तय्त स्पोन्सर हे याना बिउसां नं भर्ना जुयाः छुं ई लिपा हे उपिं मांबौपिं लिसें तुं ख्वपया थीथी अप्पा भट्टाय् ज्या याः वनेगु यानाच्वंगु लूगु दु । थ्व गांया अप्वः धइथें मानन्धरत ख्वपया सुडाल, ताथलीइ च्वंगु अप्पा भट्टाय् ज्या याः वनेगु यानाच्वंगु दु ।

गामय् च्वनेगु छेँ छखा बाहेक बुँ तकं मदुगु जुयाः उमिगु मुख्य आयश्रोत धइगु हे अप्पा छीगु खः । तर तःधीपिंसं जक अप्पा छिनाः नं कमाई मगाइगु जुयाः उमिसं मस्तय्त नापं भट्टाय् छ्यले हइगु खः । अप्पा भट्टाय् वइबलय् गामय् मस्तय् ब्वनेगु छुटे जुइ । उकिं अनया अधिकांश मानन्धर मस्त आखः तकं मसः । तःधीपिं मनूत नं अप्वः आखः मसःपिं हे लूगु खँ डा. सैंजुं कनादिल ।

ख्वपया अप्पा भट्टातय्सं बिचौलिया हे खटे यानाः रामेछापया गांगामय् भट्टाय् ज्या याइपिं मनूत मायेके हयाच्वंगु दइ । थ्व बिचौलियातय्सं मस्तय्त नापं ध्यबा बी धकाः ह्ययेकाः ब्वना यंकेगु यानाच्वंगु खँ धाःगु दु । बिचौलियात नं मानन्धर हे जुयाच्वनी ।
मानन्धर थेंज्याःगु नेवाः समुदायया थ्व अवस्था बारे येँया मानन्धर संघ व थीथी नेवाः संघ संस्थातय्सं चिउताः तयाः स्वये माःगु खँ नं डा. सैंजुं कनादिल ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु